پاکستان
کراچی، طوفان کے اثرات نمودار، لہریں حفاظتی پشتے عبور کرنے لگیں
شہر قائد کے گہرے سمندرمیں طوفان کے اثرات نمودارہوناشروع ہوگئے،سی ویو پراونچی سمندری لہریں حفاظتی پشتے کو عبورکرنے لگیں۔
کراچی کے طویل ساحل سمندرسی ویوپربحیرہ عرب میں بننے والے سمندری طوفان بیپارجوئے کے اثرات نمودارہوناشروع ہوگئے،پیرکی شام سمندری لہروں میں طغیانی جیسی صورتحال پیداہوئی،جس کے دوران سمندر کی اونچی لہریں حفاظتی پشتے کوعبورکرنے لگیں۔
سمندر کا کھارہ پانی اچھل کر ذیلی سڑک تک آگیا،عام حالات میں یہ لہریں حفاظتی پشتے سے کئی گزدورسے واپس پلٹ جاتی ہیں۔
اگلے 18سے24گھنٹوں کے دوران طوفان کے کراچی کے ساحلوں سے مزید قریب ہونے کے سبب سی ویو،ہاکس بے،سینڈزپٹ سمیت دیگرساحلی مقامات پراونچی لہروں کی وجہ سے قرب وجوار کے علاقوں میں پانی داخل ہوسکتا ہے۔