سندھ میں استعمال شدہ گاڑیوں کی ٹرانسفر پر فزیکل فٹنس چیکنگ ختم کرنے کا فیصلہ

سندھ حکومت نے استعمال شدہ گاڑیوں کی ٹرانسفر پر فزیکل فٹنس چیکنگ ختم کرنے کا فیصلہ کیا ہے۔

سندھ کے سینئر وزیر شرجیل انعام میمن کی زیر صدارت اجلاس میں سیکریٹری ایکسائز، ڈی جی ایکسائز، آٹوموٹو ٹریڈرز اینڈ امپورٹررزایسو سی ایشن کے نمائندگان شریک ہوئے۔

اجلاس میں گاڑیوں کی ٹرانسفر پر دفتری کاغذی کارروائی فی الحال جاری رکھنے اور مستقبل میں ختم کرنے پر بھی غور کیا گیا،گاڑیوں کی آن لائن ٹرانسفر کے لئے سافٹ ویئر لانچ کرنے کا بھی فیصلہ کیا گیا۔

اجلاس میں تاجروں نے گاڑیوں کی رجسٹریشن، فزیکل فٹنس سمیت دیگر مسائل سے متعلق سینئر وزیر شرجیل انعام میمن کو آگہی دی ،ملاقات میں پرائیویٹ اور کمرشل گاڑیوں کے کرنٹ اور بیک لاگ کے مسئلے بھی بات کی گئی۔

سینئر وزیر شرجیل انعام میمن نے تاجروں کے مسائل کے فوری حل کی یقین دہانی کرائی۔ انہوں نے کہا کہ گاڑیوں کی ٹرانسفر پر دفتری کاغذی کارروائی فی الحال جاری رہے گی، جلد ہی اس کو بھی ختم کردیا جائے گا۔

شرجیل انعام میمن نے کہا کہ تمام اسٹیک ہولڈرز کو اعتماد میں لے کر تاجروں کے مسائل ترجیحی بنیادوں پر حل کئے جائیں گے،تاجر، خاص طور پر کراچی کے ٹریڈرز اور امپورٹرس ملکی معیشت میں اہم حیثیت کے حامل ہیں۔

صوبائی وزیر نے کہا کہ سندھ حکومت نے ہمیشہ تاجروں کے مسائل کو ترجیحی بنیادوں پر حل کیا ہے،گاڑیوں کے رجسٹریشن سمیت تاجروں کے دوسرے مسائل ترجیحی بنیادوں پر حل کئے جائیں گے۔

شرجیل انعام میمن نے کہا کہ ریڈ لائن بی آر ٹی کی وجہ سے تاجروں کو  دشواری نہیں ہوگی،  اس ضمن میں پہلے ہی ہدایات جاری کر چکے ہیں۔

اجلاس میں آٹوموٹو ٹریڈرز اینڈ امپورٹررز ایسو سی ایشن کے سجاد بھٹی،اعراف پراچہ، محمد اکبر،عبدالرحیم، امجد عاقل اور اعجاز احمد شریک ہوئے۔