پاکستان
ترقیاتی اور دفاعی بجٹ قرضوں پر چل رہا ہے، ترقی کے لیے سیاسی استحکام ضروری ہے، احسن اقبال
وفاقی وزیر منصوبہ بندی احسن اقبال نے کہا ہے کہ ترقیاتی اور دفاعی بجٹ قرضوں پر چل رہا ہے،پائیدار ترقی کے لیے سیاسی استحکام ضروری ہے۔
اسلام آباد میں میڈیا سے گفتگو کرتے ہوئے احسن اقبال نے کہا کہ چوتھی بار وزارت منصوبہ بندی کا عہدہ سنبھال رہا ہوں،پاکستان کی ترقی کے بہت سے منصوبے بنائے،سیاسی عدم استحکام کی وجہ سے منصوبے پایہ تکمیل تک نہ پہنچ سکے،ملک کو پائیدار ترقی میں تبدیل کرنے کیلئے سیاسی استحکام ضروری ہے،سیاسی استحکام تک دنیا کے کسی ملک نے کامیابی حاصل نہیں کی،کسی ملک میں سیاسی تسلسل کا بڑا کلیدی کردار رہا ہے۔
احسن اقبال نے کہا کہ نئے عزم کے ساتھ کام کو آگے بڑھائیں گے،پاکستان کو پائیدار ترقی پر ڈالنے کیلئے ٹھوس منصوبہ بندی کریں گے،ہمیں زراعت ، صنعت، پیداواری شعبے کی صلاحیت میں ٹیکنالوجی کو شامل کرناہے،پاکستان کیلئے بہت بڑا موقع سی پیک فیز 2 کے بارے میں ہے،ہم پورے عزم سے چین کی پیشکش کو حقیقت میں ڈھالیں گے۔
وفاقی وزیر منصوبہ بندی نے کہا کہ اس وقت ترقیاتی اور دفاعی بجٹ قرضوں پر چل رہا ہے،قرضوں کی ادائیگی میں 7500 ارب سے زائد پیسے درکار ہیں،قرضوں کی ادائیگی کیلئے وسائل سے ہٹ کر مزید قرضے لینے کی ضرورت ہے۔