سابق ڈپٹی سپیکر پنجاب اسمبلی دوست محمد مزاری مسلم لیگ ن میں شامل

سابق ڈپٹی سپیکر پنجاب اسمبلی دوست محمد مزاری اور جھنگ سے آصف معاویہ اور نیلم سیال نے مسلم لیگ ن میں شمولیت کا اعلان کیا ہے۔

اس بات کا اعلان مسلم لیگ ن کے سینئر رہنما رانا ثناء اللہ کے ساتھ مشترکہ پریس کانفرنس میں کیا گیا۔

اس موقع پر رانا ثناء اللہ خان نے کہا کہ ہر حلقے سے 6 سے 8 درخواستیں آئی ہیں،ہر حلقےسے ایک،ایک امیدوار حصہ لے گا،انٹرویوزمکمل ہوتے ہی امیدواروں کے ناموں کا اعلان کردیا جائےگا،ضلع جھنگ کے امیدواروں کے آج انٹرویوزمکمل کئے گئے۔

راناثنااللہ نے کہا کہ جھنگ سے کچھ معززممبران مسلم لیگ (ن) میں شامل ہونے جارہے ہیں،معززممبران نے مسلم لیگ (ن)،نوازشریف،شہبازشریف پر اعتماد کا اظہار کیا،ضلع جھنگ 2018 میں مسلم لیگ (ن) کے لحاظ سے خالی تھا،جھنگ کے کچھ ساتھی تعاون کررہے تھے اب شمولیت کررہے ہیں،آصف معاویہ اور نیلم سیال مسلم لیگ (ن) میں شامل ہورہے ہیں،سابق ڈپٹی اسپیکر پنجاب اسمبلی دوست مزاری بھی مسلم لیگ (ن) میں شامل ہورہے ہیں۔

رانا ثناءاللہ نے کہا کہ نوجوانوں اور بزرگوں نے مل کر ملک کو آگے بڑھانا ہے،عمران خان نے نوجوانوں کو بزرگوں کا گستاخ بنایا،جمہوریت آزادی اظہار رائے کا نام ہے،نوازشریف کی قیادت میں ملک کو مشکلات سے نکالیں گے۔ مسلم لیگ (ن) عام انتخابات کیلئے پوری طرح تیار ہے،چاہتے ہیں الیکشن 8 فروری کو ہوں،یہ قبول نہیں کہ ملتوی ہو جائیں۔