قاسم سوری کے حلقے میں دوبارہ الیکشن، چینی کی قیمت اور لوڈشیڈنگ سمیت اہم مقدمات اگلے ہفتے سماعت کے لیے مقرر

سابق ایم پی اے ثمینہ خاور حیات کی نااہلی کے خلاف نظرثانی درخواست،قاسم سوری کے حلقہ میں دوبارہ انتخابات کے فیصلے کے خلاف اپیل سمیت سپریم کورٹ میں اہم مقدمات اگلے ہفتے سماعت کے لیے مقرر کر لیے گئے۔

سابق ایم پی اے ثمینہ خاور حیات کی نااہلی کیخلاف نظرثانی درخواست پر سماعت 19 مارچ کو ہوگی،قاسم سوری کے حلقہ میں دوبارہ انتخابات کے فیصلے کے خلاف اپیل پر سماعت 20 اپریل کو ہوگی۔عدالت نے گزشتہ سماعت پر قاسم سوری کو ذاتی حیثیت میں پیش ہونے کا حکم دیا تھا۔

تہمینہ دولتانہ کی اپنے حلقے میں ووٹوں کی تصدیق کی درخواست پر سماعت بھی 20 مارچ کو ہوگی،تہمینہ دولتانہ نے 2021 میں سپریم کورٹ سے رجوع کیا تھا۔مونال ریسٹورنٹ لیز کیس اور ایم ڈی پی ٹی وی تعیناتی کیسز کی سماعت 21 مارچ کو ہوگی،چیف جسٹس قاضی فائز عیسیٰ کی سربراہی میں تین رکنی بنچ کیسز کی سماعت کرے گا۔

بجلی و گیس کے بلوں میں اضافی سیلز ٹیکس کیخلاف اپیلیں 18 مارچ کو سماعت کیلئے مقرر کی گئی ہیں،جسٹس منصور علی شاہ کی سربراہی میں تین رکنی بینچ سماعت کرے گا۔

سپریم کورٹ نے چینی کی قیمت کے تعین کا کیس بھی 18 مارچ کو سماعت کیلئے مقرر کر دیا،جسٹس منصور علی شاہ کی سربراہی میں تین رکنی بینچ حکومتی اپیلوں پر سماعت کرے گا۔لاہور ہائیکورٹ نے قرار دیا تھا کہ چینی سمیت کھانے پینے کی متعدد اشیاء کی قیمتیں مقرر کرنا حکومت کا اختیار نہیں،ہائیکورٹ فیصلے کیخلاف وفاقی حکومت نے اپیل دائر کر رکھی ہے۔

بجلی کی لوڈشیڈنگ کیخلاف درخواست 21 مارچ کو سماعت کیلئے مقرر کی گئی ہے،جسٹس منصور علی شاہ کی سربراہی میں تین رکنی بینچ سماعت کرے گا۔آل پاکستان ٹیکسٹائل ملز ایسوسی ایشن نے لوڈشیڈنگ کیخلاف نظرثانی درخواست دائر کر رکھی ہے۔ پنجاب میں ایڈیشنل سیشن ججز کی تعیناتی کیخلاف درخواستوں پر 22 مارچ کو سماعت ہوگی،جسٹس منصور علی شاہ کی سربراہی میں تین رکنی بینچ سماعت کرے گا۔