عمران خان پارٹی چھوڑ کر جانے والوں کی واپس لینے پر غور کریں، اعجاز چوہدری اور عمر چیمہ کی اپیل

کوٹ لکھپت جیل  لاہور سے پی ٹی آئی سینیٹر اعجاز احمد چوہدری اور سابق گورنر پنجاب عمر سرفراز چیمہ نے جیل سے خط  لکھ کر پارٹی چھوڑ کر جانے والوں کو واپس لینے کی اپیل کردی۔

اعجاز چوہدری اور عمر سرفراز چیمہ کا کہنا ہے جبر کے اس ماحول میں ہر فرد مشکلات ، دباؤ اور ظلم و تشدد کا مقابلہ نہیں کر سکتا اس لئے پارٹی چھوڑ دی ۔ایک سال گزارنے کے بعد چیئرمین عمران خان کی استقامت اور بہادری دیکھ کر اور 8 فروری کے الیکشن میں عوام کا فیصلہ دیکھ کر بہت سارے لوگ واپس آنا چاہتے ہیں۔

اعجاز چوہدری اور عمر سرفراز نے لکھا کہ بانی چیئرمین سے اپیل ہے کہ انہیں کارکن کی حیثیت سے واپس آنے اور کام کرنے کی اجازت دے جائے تاکہ تحریک تحفظ آئین پاکستان میں حصہ لے سکیں ۔

دونوں اسیر سیاسی لیڈروں نے لکھا کہ وہ تمام افراد جو پارٹی میں دوبار شاملِ ہونا چاہتے ہیں وہ موجود چیئرمین بیرسٹر گوہر علی خان کے نام اپیل کریں اور کور کمیٹی سے سفارش کے بعد وہ نام بانی چیئرمین عمران خان کو منظوری کے لیے بھیجے جائیں۔