عمران خان نے آئی ایم ایف کو خط لکھ دیا

بانی پی ٹی آئی عمران خان نے کہا ہے کہ آئی ایم ایف کو خط لکھ دیا ہے، آج خط چلا گیا ہوگا۔

راولپنڈی اڈیالہ جیل میں کمرۂ عدالت میں صحافیوں سے غیر رسمی گفتگو کرتے ہوئے عمران خان نے کہا کہ اگر ایسے حالات میں ملک کو قرضہ ملا تو قرضے کو واپس کون کرے گا، اس قرض سے غربت بڑھے گی۔

بانی پی ٹی آئی نے کہا کہ جب تک سرمایہ کاری نہ ہو قرض بڑھتا جائے گا، سب سے پہلے ملک میں سیاسی استحکام لایا جائے۔

انہوں نے کہا کہ پہلے نواز شریف کی سلیکشن کے لیے اداروں کو تباہ کیا گیا۔ عدالتیں اور نیب سب کچھ تباہ کیا تاکہ نواز شریف کو سلیکٹ کرسکیں۔

بانی پی ٹی آئی نے کہا کہ نواز شریف کے لیے مجھے زیرو کیا گیا اور پھر انتخابات میں دھاندلی کرائی گئی۔

انہوں نے کہا کہ اب کمشنر راولپنڈی کے انکشافات سامنے آئے ہیں، کمشنر کو اٹھایا گیا اور تشدد کیا گیا، اب سافٹ ویئر اپ ڈیٹ ہے۔

اڈیالہ جیل کے باہر میڈیا سے بات کرتے ہوئے عمران خان کے وکیل بیرسٹر علی ظفر نے کہا کہ عمران خان نے کہا ہے آئی ایم ایف کو خط لکھیں گے لیکن ابھی لکھا نہیں۔عمران خان نے کہا ہے آئی ایم ایف کا پروگرام جاری رہنا چاہیئے۔ عمران خان نے کہا ہے پاکستان کی اکانومی کو بہتر کرنے کی ضرورت ہے،عمران خان کہا ہے پاکستان میں معاشی اور سیاسی استحکام کی ضرورت ہے۔

بیرسٹر علی ظفر کے مطابق عمران خان نے کہا جمہوریت کیلئے جس فورم پر بھی آواز اٹھانے کی ضرورت ہوئی اٹھائیں گے،خط لکھنے کا شاید انہوں نے کہا ہے یہ ابھی بتائیں گے آپ کو۔