ایئرسیال کی سیالکوٹ سے جدہ نئی پرواز کا افتتاح

قونصل جنرل یواے ای قونصلیٹ کراچی بخیت عتیق الرمیثی نے سیالکوٹ ائیر پورٹ پرسیالکوٹ کی بزنس کمیونٹی کے زیراہتمام چلنے والی انٹرنیشنل فضائی کمپنی ائیرسیال کی سیالکوٹ سے جدہ نئی فلائٹ کا افتتاح کیا۔

افتتاحی تقریب کے موقع پر سیالکوٹ سمیت دیگر اضلاع سے بزنس کمیونٹی کی بڑی تعداد اور ائیر سیال کے بورڈ آف ڈائریکٹرز کے ممبران بھی موجود تھے۔

بخیت عتیق الرمیثی نے کیک کاٹ کر فلائٹ کا باقاعدہ افتتاح کیا،اس موقع پر یواے ای قونصل جنرل نے کہا کہ ائیر سیال ایک بین الاقوامی معیار کی فضائی کمپنی ہے،جس نے اپنی اعلیٰ اور معیاری سروس سے بہت کم عرصہ میں اپنا ایک الگ مقام بنا لیاہے،ائیرسیال کی پوری مینجمنٹ اور ڈائریکٹرز کو نئی انٹرنیشنل فلائٹ کے آغاز پر مبارکباد پیش کرتے ہیں۔

انہوں نے کہا کہ سیالکوٹ کی بزنس کمیونٹی نے اپنی مدد آپ کےتحت پہلے انٹرنیشنل ائیرپورٹ اور اب فضائی کمپنی بنا کر خود کو دنیا میں ممتاز ثابت کیا ہے ہماری دعاہے کہ پاکستان کے چپہ چپہ میں اسی طرح ترقی ہو اور پاکستان کے عوام خوشحال ہوں۔