عدلیہ پر دباؤ ڈالا جا رہا ہے، ججوں کو نامعلوم فون کالز پر دھمکیاں مل رہی ہیں، عمران خان

سابق وزیراعظم عمران خان نے الزام عائد کیا ہے کہ عدلیہ اور ججوں پر دباؤ ڈالا جا رہا ہے اور ملک کے تمام اداروں کو تحریک انصاف کے لیے استعمال کیا جا رہا ہے۔

سوشل میڈیا پر ویڈیو خطاب میں عمران خان نے کہا کہ ’ہمارے کئی کارکنوں پر تشدد کیا گیا جو تحریک انصاف کے ساتھ کھڑے ہیں۔‘

عمران خان نے کہا کہ ’یہ جانتے ہیں کہ ڈیڑھ دو سو لوگوں کے علاوہ باقی سب پرامن احتجاج کر رہے تھے اور آئین ہمیں اجازت دیتا ہے ہم کہیں بھی احتجاج کر سکتے ہیں۔‘

انھوں نے کہا کہ ’جیسے کمانڈو ایکشن کر کے مجھے گرفتار کیا گیا تو احتجاج عسکری علامات پر ہی ہونا تھا اور کہاں جانا تھا۔‘

عمران خان نے الزام عائد کیا کہ ’عدلیہ بھی دباؤ میں ہے، ججوں کو نامعلوم فون کالز آ رہی ہیں کہ ہم یہ کر دیں گے۔‘

ان کا کہنا تھا کہ ’سارے ملک کے اداروں کو استعمال کیا جا رہا ہے کہ تحریک انصاف کو ختم کیا جائے۔ ایف آئی اے اور نیب صرف تحریک انصاف کے خلاف کیسز بنا رہے ہیں۔‘

عمران خان نے کہا کہ ’اب تک مجھے یہ سمجھ آئی ہے کہ ایک کنگ پارٹی تیار ہو رہی ہے۔‘

عمران خان نے کہا کہ ’نہ ن لیگ، نہ پیپلز پارٹی پورے ملک میں حکومت بنا سکتے ہیں، اسی لیے کنگز پارٹی کی مدد سے مخلوط حکومت بنانے کی کوشش کی جار ہی ہے۔‘

عمران خان نے کہا کہ ملک کی مشکلات ایک کمزور حکومت حل نہیں کر سکتی۔

’مضبوط حکومت وہ ہوتی ہے جس کے پیچھے اسٹیبلشمنٹ نہیں بلکہ عوام کھڑی ہو، وہی حکومت مشکل فیصلے کرسکتی ہے۔