پاکستان
کراچی ایئرپورٹ، طوفانی ہوا کے دوران لینڈنگ میں مشکل،گورنر سندھ بھی طیارے میں موجود تھے
کراچی ائیرپورٹ پر طوفانی ہواوں کے سبب نجی ائیرلائن فلائی جناح کے طیارے کو لینڈنگ کے دوران مشکل کا سامنا ہوا۔
ذرائع کے مطابق ملکی نجی ائیرلائن فلائی جناح کے کراچی ائیرپورٹ پر عین لینڈنگ کے وقت طوفانی ہوائیں شروع ہو گئیں،طیارہ ایک مرتبہ رن وے کو ٹچ کرنے کے بعد ایک بار پھر فضا میں بلند ہوا۔
طیارے نے گو راؤنڈ کے بعد دوسری کوشش میں لینڈنگ کی، پائلٹ نے مہارت کا مظاہرہ کرتے ہوئے بحفاظت لینڈنگ کی،اسلام آباد سے آنے والی اس پرواز میں گورنر سندھ بھی اپنی فیملی کے ساتھ موجود تھے۔
پرواز میں صوبائی وزیر داخلہ اور سابق وفاقی وزیر فیصل واوڈا بھی سوار تھے،ہنگامی صورتحال سے دوچار ہونے کے دوران طیارے میں مسافر شدید خوف وہراس کا شکار ہو گئے تھے اور بلند آواز سے دعائیں مانگتے رہے، بحفاظت لینڈگ پر اللہ کا شکر اداکیا۔