پاکستان
کراچی: لسبیلہ چوک پر سیوریج لائن میں دھماکہ، 8 افراد زخمی
کراچی کے علاقے جمشید کوارٹر میں لسبیلہ چوک کے قریب سیوریج لائن کے دھماکے سے 8 افراد زخمی ہو گئے جبکہ متعدد دکانیں تباہ ہو گئیں۔
پولیس کے مطابق لسبیلہ چوک کے قریب نعمان مسجد کے سامنے زیر زمین سیوریج لائن میں نماز جمعہ کے بعد زوردار دھماکہ ہوا۔
دھماکے کے نتیجے میں لگ بھگ 100 گز تک کی دکانیں اور ایک پکوان ہاؤس کو شدید نقصان پہنچا۔
ایدھی فاؤنڈیشن کے مطابق اس واقعہ کے 8 زخمیوں کو ٹراما سینٹر منتقل کر دیا گیا ہے۔
سربراہ ٹراما سینٹر ڈاکٹر صابر میمن کے مطابق دھماکے میں 8 افراد زخمی ہوئے ہیں، جن میں سے ایک زخمی کی حالت تشویشناک ہے جبکہ دیگر زخمیوں کے جسم کے مختلف حصوں پر معمولی نوعیت کے زخم ہیں۔
ان کا کہنا ہے کہ زخمیوں کی عمریں 24 سے 50 سال کے درمیان ہیں۔
پولیس نے بیان میں بتایا کہ زخمی ہونے والوں کی شناخت لعل محمد، اعجاز، حفیظ، منصور، نصیر الدین، خرم، منصور، عارف اور زوق اختر شامل ہیں۔
سرکاری خبر رساں ادارے ’اے پی پی‘ نے ریسکیو 1122 حکام کا حوالہ دیتے رپورٹ کیا کہ دھماکا سیوریج لائن میں گیس بھرنے کے باعث ہوا۔