پاکستان
کراچی کا مسئلہ نل کے پانی کا نہیں آنکھوں کے پانی کا ہے، خالد مقبول صدیقی
پچھلے 15 سال میں سندھ کی صوبائی حکومت کو 22 ہزار ارب ملے ہیں مگر کہیں نظر نہیں آئے
ایم کیو ایم پاکستان کے چیئرمین ڈاکٹر خالد مقبول صدیقی نے کہا ہے کہ کراچی شہر چلتا یے تو پورا ملک بنتا ہے ،کراچی نے اسلام آباد کو بنا دیا ہے، اب اسلام آباد کی ذمہ داری ہے،پچھلے 15 سال میں سندھ کی صوبائی حکومت کو 22 ہزار ارب ملے ہیں مگر کہیں نظر نہیں آئے،کراچی کا مسئلہ نل کے پانی کا نہیں بلکہ آنکھوں کے پانی کا ہے۔
ڈاکٹر خالد مقبول صدیقی نے کراچی میں عزیز گورنمنٹ کمپری ہینسو ہائی اسکول عزیز آباد میں ویب لیب کی افتتاحی تقریب سے خطاب کرتے ہوئے کہا کہ سندھ میں دو طبقات ہیں۔ ایک وہ جو 97 فی صد ریونیو کما کر دیتا ہے اور دوسرا وہ جو اسے ٹھنڈے کمروں میں بیٹھ کر کھا جاتا ہے۔
خالد مقبول کا یہ بھی کہنا تھا کہ کراچی کو نئے عہد کے مطابق تعلیم یافتہ اور ہنر مند بنائیں گے، اب کوئی کوٹہ کچھ نہیں بگاڑ سکتا،ڈومیسائل کی بنیاد پر انصاف نہیں ہوتا۔
اس موقع پر پاکستان سائنس فاؤنڈیشن کے چیئرمین اور دیگر اساتذہ نے بھی اظہار خیال کیا۔