اسرائیلی ہم منصب سے ملاقات پر لیبیا کی وزیر خارجہ برطرف

لیبیا کی حکومت نے اسرائیلی ہم منصب سے گزشتہ ہفتے روم میں ملاقات پر وزیر خارجہ معطل کر دیا۔

وزیر اعظم عبدالحمید دبیبہ نے اتوار کی شام فیس بک پر پوسٹ کیے گئے ایک سرکاری فیصلے میں کہا کہ نجلہ المنگوش کو "عارضی طور پر معطل” کر دیا گیا ہے اور وزیر انصاف کی سربراہی میں ایک کمیشن کے ذریعے ” تحقیقات” کی جائے گی۔

لیبیا کی وزارت خارجہ نے اسے "موقع اور غیر سرکاری ٹکراؤ” کے طور پر بیان کیا، لیکن اس ملاقات کی خبروں پر لیبیا کے کئی شہروں میں سڑکوں پر احتجاج ہوا ۔

یہ سیاسی تنازع اتوار کو اس وقت شروع ہوا جب اسرائیل کی وزارت خارجہ نے کہا کہ دونوں ممالک کے وزرائے خارجہ کی گزشتہ ہفتے ملاقات ہوئی تھی۔

بیان میں کہا گیا ہے کہ اسرائیلی وزیر خارجہ ایلی کوہن اور لیبیائی ہم منصب منگوش نے روم میں اطالوی وزیر خارجہ انتونیو تاجانی کی میزبانی میں ایک اجلاس میں بات چیت کی۔

اسرائیلی بیان میں اسے دونوں ممالک کے درمیان اس قسم کا پہلا سفارتی اقدام قرار دیا گیا ہے۔

کوہن نے اسرائیل کی وزارت خارجہ کے بیان میں کہا کہ "میں نے وزیر خارجہ سے دونوں ممالک کے درمیان ان کے تعلقات کے بارے میں بات کی۔”

لیکن لیبیا کی وزارت خارجہ نے اتوار کی شام کہا کہ منگوش نے اسرائیل کی نمائندگی کرنے والے کسی بھی فریق سے ملاقات سے انکار کیا تھا۔

وزارت نے ایک بیان میں کہا، "روم میں جو کچھ ہوا وہ ایک غیر سرکاری ٹکراؤ تھا، اطالوی ہم منصب کے ساتھ ملاقات کے دوران، جس میں کوئی بات چیت، معاہدہ یا مشاورت شامل نہیں تھی۔

بیان میں مزید کہا گیا کہ وزیر نے "فلسطینی کاز کے حوالے سے لیبیا کے موقف کو واضح اور غیر مبہم انداز میں دہرایا”۔

اس ملاقات کی خبروں نے لیبیا کے کچھ شہروں میں مظاہروں کو جنم دیا اور ملک کی صدارتی کونسل کی جانب سے ایک خط کے ذریعے وضاحت کی درخواست کی گئی تھی۔

لیبیا کی وزارت خارجہ نے اسرائیل پر الزام عائد کیا کہ وہ "اس واقعے کو” ملاقات یا مذاکرات کے طور پر پیش کرنے کی کوشش کر رہا ہے۔

اسرائیل کی وزارت خارجہ کے بیان میں، کوہن کا حوالہ دیتے ہوئے کہا گیا کہ دونوں نے "لیبیا کے یہودیوں کے ورثے کے تحفظ کی اہمیت پر تبادلہ خیال کیا، جس میں ملک میں عبادت گاہوں اور یہودی قبرستانوں کی تزئین و آرائش بھی شامل ہے”۔

انہوں نے مزید کہا کہ "لیبیا کا حجم اور تزویراتی محل وقوع اسرائیل کی ریاست کے لیے ایک بہت بڑا موقع فراہم کرتا ہے۔”

روم سے ملاقات کی فوری طور پر کوئی تصدیق نہیں ہو سکی۔

سڑکوں پر احتجاج

لیبیا الاحرار ٹی وی کے مطابق اس سے قبل اتوار کی شام لیبیا کی صدارتی کونسل نے حکومت سے "وضاحت” کی درخواست کی تھی۔

صدارتی کونسل، جس کے پاس کچھ انتظامی اختیارات ہیں اور یہ اقوام متحدہ کے حمایت یافتہ سیاسی عمل سے قائم کی گئی ہے،کونسل میں تین اراکین شامل ہیں جو لیبیا کے تین صوبوں کی نمائندگی کرتے ہیں۔

صدارتی کونسل کے خط میں کہا گیا کہ یہ پیشرفت لیبیا کی ریاست کی خارجہ پالیسی کی عکاسی نہیں کرتی، لیبیا کے قومی استحکام کی نمائندگی نہیں کرتی اور اسے لیبیا کے قوانین کی خلاف ورزی تصور کیا جاتا ہے جو ‘صہیونی ادارے’ کے ساتھ معمول کو جرم قرار دیتے ہیں۔

کونسل نے حکومت کے سربراہ سے کہا کہ "اگر میٹنگ ہوئی تو قانون کا اطلاق کریں”۔

طرابلس اور اس کے مضافات کی سڑکوں پر اتوار کی شام اسرائیل کے ساتھ معمول پر لانے کے خلاف مظاہرے پھوٹ پڑے۔ یہ احتجاج دوسرے شہروں تک پھیل گیا جہاں نوجوانوں نے سڑکیں بلاک کیں، ٹائر جلائے اور فلسطینی پرچم لہرایا۔

شمالی افریقی ممالک کی طرح لیبیا میں بھی یہودیوں کا بھرپور ورثہ ہے۔

اسرائیل نے حالیہ برسوں میں کچھ عرب ممالک کے ساتھ تعلقات کو معمول پر لایا ہے جو کہ ابراہم معاہدے کے نام سے مشہور امریکی حمایت یافتہ معاہدوں کا حصہ ہیں۔

تاہم، وزیر اعظم بنجمن نیتن یاہو کی سخت گیر حکومت مغربی کنارے میں بڑھتے ہوئے تشدد اور مقبوضہ علاقے میں یہودی بستیوں کی توسیع کی حمایت کرنے کی وجہ سے عرب ریاستوں کی جانب سے شدید تنقید کی زد میں ہے۔