ٹیم سلیکشن میرٹ پر کریں، بابر کو کپتان رہنے دیں، سینئر کھلاڑیوں کا ذکا اشرف کو مشورہ

سینئر کرکٹرز نے چیئرمین پی سی بی مینجمنٹ کمیٹی ذکاء اشرف کو اہم مشورے دئیے ہیں اور کہا ہے کہ سلیکشن پی ایس ایل کی بنیاد پر نہیں ہونی چاہئے، بابر اعظم کو کپتان برقرار رکھا جائے۔

چیئرمین پی سی بی مینجمنٹ کمیٹی ذکاء اشرف نے سینئر کرکٹرز، مشیر کھیل پنجاب وہاب ریاض، محمد حفیظ اور سہیل تنویر سے مشاورت کی۔

سینئر کرکٹرز نے چئیرمین پی سی بی مینجمنٹ کمیٹی ذکاء اشرف کو اہم مشورے دئیے۔

سینئر کھلاڑیوںنے رائے دی کہ پی ایس ایل کی بنیاد پر کھلاڑیوں کی سلیکشن سمجھ سے باہر ہے،ایک پی ایس ایل کے میچ میں اچھی اننگز کے بل بوتے پر کھلاڑی کو قومی ٹیم میں شامل کیا جاتا ہے۔

 سینئیر کھلاڑیوں نے کہا کہ جس نے ڈومیسٹک نہیں کھیلا وہ پی ایس ایل سے قومی ٹیم میں آتا ہے ڈومیسٹک سیزن کھیلنے والوں کے ساتھ ناانصافی ہے،جب ڈومیسٹک سیزن کے پرفارمرز کو عزت نہیں دی جائے گی تب یہی رزلٹس سامنے آئیں گے،سلیکشن کمیٹی وہ ہونی چاہیے جو میرٹ پر کام کرے۔

ذکا اشرف نے رائے مانگی کہ بابر اعظم کی کپتانی پر سب تنقید کررہے ہیں کیا کریں؟ اس پر سینئر کھلاڑیوں نے کہا کہ ابھی ون ڈے اگلے سال ہے ابھی کپتانی پر بات نہ کریں،بابر اعظم کو ابھی کپتان رہنے دیں اس کو نہ چھیڑیں،ابھی ٹیسٹ سیریز ہے اور اگلے سال ٹی ٹونٹی ورلڈکپ ہے اسکو مدنظر رکھ کر فیصلے کریں۔