معین خان نے محمد عامر کی ٹیم میں واپسی کی حمایت کردی

حال ہی میں ہونے والے ایشیا کپ کے سپر فور مرحلے میں پاکستان کرکٹ ٹیم کی مایوس کن کارکردگی کے بعد بولرز کی پرفارمنس کو تنقید کا نشانہ بنایا جا رہا ہے،پاکستانی کرکٹ فینز کی جانب سے یہ مطالبہ بھی کیا جا رہا ہے کہ فاسٹ بولر محمد عامر کو پاکستان کرکٹ ٹیم میں واپس لینا چاہیے۔

صحافیوں نے محمد عامر کی واپسی کے حوالے سے جب پاکستان کرکٹ ٹیم کے سابق کپتان معین خان سے سوال کیا تو انہوں نے فاسٹ بولر کی انٹرنیشنل کرکٹ میں واپسی کی حمایت کر دی ہے۔

سوشل میڈیا پر وائرل ہونے والی ویڈیو میں معین خان نے کہا ہے کہ محمد عامر لیگز کھیل رہا ہے اور اچھا پرفارم کر رہا ہے۔

انہوں نے یہ بھی کہا کہ ایسا نہیں کرنا چاہیے کہ حقدار کھلاڑی کی جگہ جو پہلے ہی ٹیم میں سیٹ ہو آپ اس کی جگہ عامر کو دوبارہ لے آئیں۔

سابق کپتان کا کہنا ہے کہ ایک طریقہ کار ہے اور اگر وہ اس عمل سے گزر کر ٹیم میں آتا ہے تو اس کو ضرور آنا چاہیے، محمد عامر بہت زبردست کرکٹر اور بولر ہے۔