ایم کیو ایم پاکستان کو مشکلات سے نکالنے میں اپنا کردار ادا کرے گی، برطانوی ہائی کمشنر

متحدہ قومی موومنٹ پاکستان کے اعلیٰ سطح کے وفد نے برٹش ہائی کمشنر جین میریٹ سے کراچی میں ملاقات کی۔ اس ملاقات میں ایم کیو ایم پاکستان کے سینئر مرکزی رہنما و رکن قومی اسمبلی سید مصطفیٰ کمال، ڈاکٹر فاروق ستار، سابق سینیٹر و ڈپٹی میئر کراچی نسرین جلیل، سینیٹر سید فیصل سبزواری، رکن صوبائی اسمبلی طحہٰ احمد جبکہ ڈپٹی پولیٹیکل کونسلر مارک بیلی اور ڈپٹی ہیڈ آف مشن کراچی مارٹن ڈاؤسن بھی شریک تھے۔

ملاقات میں خطے میں پاکستان کی جغرافیائی اہمیت، پاکستان کو درپیش دہشتگردی اور معیشت کے موجودہ چیلنجر اور اُن کے حل پر تفصیلی تبادلہ خیال ہوا۔

برطانیہ کے سفارتی وفد سے گفتگو کرتے ہوئے ایم کیو ایم پاکستان کے سینئر مرکزی رہنما اور رکن قومی اسمبلی سید مصطفیٰ کمال نے کہا کہ پاکستان کو اس وقت معاشی و سیاسی بحرانوں کا سامنا ہے جس سے نمٹنے کیلئے تمام سیاسی جماعتوں کو مل کر کام کرنا ہوگا۔ پاکستان کو اس وقت برطانیہ جیسے اپنے دوست ممالک کے ساتھ کی سب سے زیادہ ضرورت ہے تاکہ مستقبل میں بھی ماضی کی طرح مشترکہ مفادات کے تحفظ کو یقینی بنایا جاسکے۔

سید مصطفیٰ کمال نے کہا کہ ایم کیو ایم پاکستان کراچی کا 80 فیصد سے زائد سیاسی مینڈیٹ رکھنے کے ساتھ ساتھ پاکستان کی معیشت میں کراچی کی اہمیت اور اس شہر کے مسائل پر گہری نظر رکھتی ہے اور ان مسائل کے حل اور مضبوط مقامی حکومتوں کے قیام کیلئے تین نکاتی آئینی ترمیم بھی پاکستان کی سیاسی قیادت کے سامنے پیش کر چکی ہے۔

وفد سے گفتگو کرتے ہوئے ڈاکٹر فاروق ستار نے موجودہ چیلنجر سے نمٹنے کیلئے سیاسی جماعتوں کے مشترکہ تعاون اور دانشمندانہ فیصلوں پر زور دیا۔

برٹش ہائی کمشنر نے پاکستان کیلئے نیک تماؤں کا اظہار کرتے ہوئے ایم کیو ایم پاکستان کے نو منتخب اراکین اسمبلی کو مبارکباد پیش کی اور اس اُمید کا اظہار کیا کہ ایم کیو ایم پاکستان جیسی اربن سینٹرڈ سیاسی جماعت پاکستان کو مشکلات سے نکالنے میں اپنا کردار ادا کرے گی۔

برٹش ہائی کمشنر جین میریٹ نے کہا کہ برطانیہ بھی مشکل کی اس گھڑی میں ہمیشہ کی طرح پاکستان کا  ساتھ دیگا۔ملاقات میں دونوں جانب سے مستقبل میں مزید ملاقاتوں اور مضبوط و مستقل رابطوں پر اتفاق کیا گیا.