آئی ایم ایف سے نئے قرض پروگرام کا فیصلہ اگلی حکومت کرے گی، اسحاق ڈار

وزیر خزانہ اسحاق ڈار نے یہ امید ظاہر کی ہے کہ بجٹ کے بعد آئی ایم ایف پروگرام کا 9واں ریویو رواں ماہ مکمل ہوجائے گا تاہم اگلے پروگرام میں جانے سے متعلق فیصلے الیکشن کے بعد اگلی حکومت کو کرنا ہوں گے۔

جیو نیوز کے پروگرام میں گفتگو کے دوران وزیرخزازہ اسحاق ڈار نے کہا کہ وہ 25 سال سے آئی ایم ایف سے ڈیل کر کر رہے ہیں مگر انھوں نے کبھی اتنی تاخیر نہیں دیکھی۔ انھوں نے اس خدشے کا اظہار کیا کہ ایسا ’جیو پولیٹیکل معاملات‘ کی وجہ سے ہو رہا ہے۔

اسحاق ڈار نے کہا کہ جو بجٹ آئی ایم ایف کو (وزیر اعظم شہباز شریف کی ہدایت پر) دکھایا، یہ نمبرز اس سے ذرا بہتر ہیں۔ ہم نے چار ارب ڈالر فنانسنگ کا بندوبست کر لیا تھا، آئی ایم ایف مزید دو ارب ڈالر کی فنانسنگ کا بندوبست کرنے کا کہہ رہا ہے

وزیرخزانہ نے کہا کہ ہم ابھی سے دوست ممالک سے قرض کو ری سٹرکچر کرنے کے لیے بات کرنے کے مرحلے میں ہیں۔ ہم اُن کے مکمل پیسے واپس کریں گے مگر قرض واپسی کا دورانیہ بڑھانے پر مذاکرات کریں گے

اسحاق ڈار نے دعویٰ کیا کہ ستمبر کے بعد بھی آئی ایم ایف کے بغیر ڈیفالٹ کا کوئی خطرہ نہیں۔ انھوں نے یہ بھی کہا کہ آئی ایم ایف کے پاس دوبارہ جانے کا فیصلہ الیکشن کے بعد آنے والی حکومت کرے ۔