جیل میں قیدی کی سیاسی بات چیت پر پابندی کے خلاف درخواست 17 مئی کو سماعت کے لیے مقرر

جیل میں قیدی کی سیاسی بات چیت پر پابندی سے متعلق جیل رولز کی شق 265 کیخلاف شیر افضل مروت کی درخواست 17 مئی کو سماعت کے لیے مقرر کردی گئی۔

شیرافضل مروت کی درخواست پر گزشتہ سماعت کاتحریری حکمنامہ جاری کیا گیا ہے جس میں کہا گیا ہے کہ ایڈووکیٹ جنرل کی جانب سے درخواست کے ناقابل سماعت ہونے کا اعتراض اٹھایا گیا ہے،ایڈووکیٹ جنرل کے مطابق اڈیالہ جیل راولپنڈی میں ہے لہٰذا یہ درخواست لاہور ہائیکورٹ کا کے دائرہ اختیار میں آتی ہے۔

حکم نامہ میں کہا گیا کہ عدالتی معاون زینب جنجوعہ کے مطابق اسلام اباد کے قیدیوں کو بھی اڈیالہ جیل راولپنڈی میں رکھا جاتا ہے،عدالتی معاون کے مطابق اسلام اباد کی عدالتوں کی جانب سے بھیجے گئے قیدی اسلام آباد کی عدالتوں کی کسٹڈی میں ہوتے ہیں۔

حکم نامہ میں کہا گیا کہ عدالتی معاون کے مطابق اڈیالہ جیل کا اسلام آباد سے باہر ہونا اسلام آباد ہائی کورٹ کے دائرہ اختیار کو ختم نہیں کرتا،عدالتی معاون اور درخواست گزار وکیل کی جانب سے مزید گزارشات پیش کرنے کیلئے وقت مانگا گیا ہے،کیس کو 17 مئی 202 کو دوبارہ سماعت کے لیے مقرر کیا جائے۔