بائیڈن، مودی بیان پر احتجاج، امریکی سفارتکار کی دفتر خارجہ طلبی، امریکی محکمہ خارجہ نے پھر’ ڈومور‘ کہہ دیا

پاکستان کے دفتر خارجہ نے امریکی صدر جو بائیڈن اور بھارتی وزیراعظم نریندرا مودی کے مشترکہ اعلامیہ میں پاکستان پر دہشتگردی کے حوالے سے الزامات اور مطالبات پر امریکی سفارتخانے کے ڈپٹی چیف کو طلب کرکے تحفظات کا اظہار کیا۔

امریکی صدر اور بھارتی وزیراعظم کی ملاقات کے بعد جاری کئے گئے مشترکہ بیان کو پاکستان نے پہلے بھی مسترد کیا اور اسے سفارتی آداب کی خلاف ورزی قرار دیا تھا۔

دفتر خارجہ سے جاری ایک بیان میں بتایا گیا کہ امریکا کے سفارتکار کو طلب کر کے اس بات پر زور دیا گیا کہ امریکا ایسے بیانات سے گریز کرے جو پاکستان کے خلاف بھارت کے بے بنیاد اور سیاسی بیانیہ کی حوصلہ افزائی کرتے محسوس ہوں۔ اس بات پر بھی زور دیا گیا کہ پاکستان اور امریکا کے درمیان انسداد دہشتگردی تعاون آگے بڑھ رہا ہے، پاک امریکا تعلقات کی مضبوطی کے لیے اعتماد اور انڈرسٹینڈنگ پر مبنی ماحول بنانے کی ضرورت ہے۔

امریکی محکمہ خارجہ کے ترجمان میٹ ملر نے اپنی یومیہ پریس کانفرنس میں صحافیوں کو بتایا کہ پاکستان کے دہشتگرد گروپوں کے خاتمے کے لیے اہم اقدمات کئے ہیں لیکن واشنگٹن چاہتا ہے کہ پاکستان اس سے زیادہ کرے۔

امریکی ترجمان نے کہا کہ ہم پاکستان کی طرف سے لشکر طیبہ اور جیش محمد سمیت تمام دہشت گرد گروپوں، اور ان کی مختلف فرنٹ تنظیموں کو مستقل طور پر ختم کرنے کے لیے اقدامات جاری رکھنے کی اہمیت پر بھی متفق ہیں۔ اور ہم اس معاملے کو پاکستانی حکام کے ساتھ باقاعدگی سے اٹھائیں گے۔

پاکستان اور بھارت کے درمیان تعلقات ایک بار پھر کشیدگی میں اضافے کی جانب چل پڑے ہیں، پاک فوج نے ہفتہ کے روز کہا تھا کہ کنٹرول لائن کے دوسری طرف سے بھارتی فوج کجی فائرنگ سے دو شہری جاں بحق ہو گئے ہیں، فائرنگ کا یہ واقعہ 2021 کی جنگ بندی کے بعد پہلا واقعہ ہے جو کنٹرول لائن پر حالات کی خرابی کا اشارہ دے رہا ہے۔