کوئٹہ: منشیات سمگلروں سے جھڑپ میں اے این ایف کے 3 جوان زخمی

کوئٹہ میں منشیات اسمگلروں کے ساتھ جھڑپ کے دوران اینٹی نارکوٹکس فورس کے 3 جوان زخمی ہوگئے۔

ترجمان اے این ایف کے مطابق ٹیم نے مغربی بائی پاس کوئٹہ کے قریب ہوٹل پر چھاپہ مار کارروائی کی،کارروائی اہل علاقہ کی جانب سے منشیات فروشی کے خلاف شکایت کے نتیجے میں کی گئی۔

ملزمان ہوٹل کی آڑ میں منشیات فروشی کا دھندہ کرتے تھے،دوران کارروائی ملزمان نے اے این ایف کے اہلکاروں پر فائرنگ کر دی۔

ملزمان کے ساتھ فائرنگ کے تبادلے کے دوران اے این ایف کے 3 جوان زخمی ہوئے،ملزمان کی فائرنگ سے قریب سے گزرنے والے ایک ٹرک کا ڈرائیور بھی زخمی ہوا۔

ملزمان منشیات کا بیگ چھوڑ کر موقع سے فرار ہونے میں کامیاب ہو گئے،بیگ چیک کرنے پر 4 کلوگرام چرس برآمد کرلی گئی،ملزمان کی گرفتاری کیلئے تمام وسائل بروئے کار لائے جا رہے ہیں۔