دنیا
کمبوڈیا کے وزیراعظم کا فیس بک پیج 6 ماہ کے لیے معطل کرنے کی سفارش
فیس بک کمپنی میٹا کے بورڈ نے کمبوڈیا کے وزیراعظم یون سین کا اکاؤنٹ چھ ماہ کے لیے معطل کرنے کی سفارش کی ہے۔ یہ سفارش وزیراعظم کے فیس بک پیج پر پوسٹ کی گئی ایک ویڈیو کی بنا پر کی گئی ہے جسے میٹا نے تشدد کی دھمکیوں کے حوالے سے اپنی پالیسی اور رولز کی خلاف ورزی بتایا ہے۔
میٹا کا مواد کی نگرانی کے لیے بورڈ میٹا کے فنڈز سے قائم لیکن آزادانہ کام کرتا ہے، کمپنی پہلے ہی اس ویڈیو کو ٹانے کے لیے کہہ چکی ہے۔
میٹا نے ایک بیان میں کہا کہ وہ ویڈیو ہٹانے کو تیار ہے لیکن بورڈ کی سفارش کا جائزہ لینے کے بعد اس پر عمل درآمد کا فیصلہ کرے گی۔
کمبوڈیا کے وزیراعظم کا فیس بک پیج معطل کرنے کی سفارش بہت اہم وقت میں کی گئی ہے کیونکہ کمبوڈیا میں عام انتخابات میں ایک ماہ سے بھی کم وقت رہ گیا ہے، اگرچہ ناقدین اس الیکشن کو ایک ڈھکوسلہ قرار دیتے ہیں کیونکہ ان کے خیال میں کمبوڈیا کے وزیراعظم ایک ڈکٹیٹر کی طرح حکومت کر رہے ہیں۔