تاجر دوست سکیم پر تاجروں کا اعتماد بحال، دائرہ 6 شہروں سے 42 تک بڑھا دیا گیا، نعیم میر

تاجر دوست سکیم کے چیف کوآرڈینیٹر نعیم میر نے کہا ہے کہ تاجر دوست سکیم پر تاجروں کا اعتماد بحال ہوتا جا رہا ہے اور اب تک 45 ہزار کے قریب تاجر اس سکیم کے تحت رجسٹر ہو چکے ہیں جب کہ سکیم کا دائرہ کار 6 شہروں کی بجائے 42 شہروں تک پھیلا دیا گیا ہے۔

بعض تاجروں نے ٹیکس وصولی کےلیے بنائی گئی کیٹگری پر اعتراض کیا تھا۔

ریجنل ٹیکس آفس لاہور میں پریس کانفرنس کرتے ہوئے نعیم میر کا کہنا تھا کہ ایف بی آر نے دن رات محنت کرکے تاجروں کے لیے آسان تاجر سکیم بنا دی ہے اور بہت جلد ٹیکس گوشوارہ اردو میں پرنٹ کر ا کر تاجروں کو دے دیا جائے گا۔ علاقے کے حساب سے 100 روپے ماہانہ سے 60 ہزار روپے ماہانہ ٹیکس لگایا جائے گا۔
تاجر دوست سکیم کے کنوینر اور مال روڑ کےچیئرمین سہیل راڈو والے نے کہا کہ تاجروں کے اس سکیم تحت بنائی گئی کیٹگریز پر ابھی اعتراضات ہیں جن کو دور کرنے کی ضرورت ہے، امید ہے کہ حکومت اور ایف بی آر تاجروں کے اعتراضات دور کرکے اس سکیم کو مزید سہل بنا دے گا۔
نعیم میر نے کہا کہ بعض سیاسی پارٹیاں اپنے حمایت یافتہ تاجروں کو ورغلانے کی کوشش کر رہی ہیں جو درست نہیں۔ تاجروں کو اپنے سیاسی مفاد کو ایک طرف رکھ کر ملکی معیشت کے بارے میں سوچنا چاہیے۔