گندم درآمد سکینڈل کی تحقیقات میں کچھ وقت درکار ہے، میڈیا کی رپورٹنگ درست نہیں، کامران علی افضل

گندم درآمد سکینڈل کی تحقیقات کرنے والی کمیٹی کے سربراہ سیکرٹری کیبنٹ کامران علی افضل کہا ہے کہ کمیٹی میں ٹی او آرز کا اضافہ ہوا تھا جس کی وجہ سے تھوڑا ٹائم لیا گیا،میڈیا میں چلنے والی خبروں میں کوئی صداقت نہیں۔

کامران علی افضل سے سوال کیا گیا کہ وزیراعظم شہباز شریف کی جانب سے دی جانے والی ڈیڈ لائن کے باوجود سیکرٹری کیبنٹ اپنی رپورٹ پرائم منسٹر کو جمع نہ کروا سکے، کیا اپ نے وزیراعظم کو رپورٹ گندم سکینڈل کے حوالے سے جمع کروا دی ہے؟

کامران علی افضل نے جواب دیا کہ کمیٹی میں ٹی او ارز کا اضافہ ہوا تھا جس کی وجہ سے تھوڑا ٹائم لیا گیا۔

ان سے سوال کیا گیا کہ کیا نگراں وزیراعظم انوار الحق کاکڑ کو بلا رہے ہیں؟ اس پر کیبنٹ سیکرٹری نے کہا کہ میڈیا میں چلنے والی خبروں میں کوئی صداقت نہیں، اس طرح کی خبریں آپ کیوں چلاتے ہیں؟

ان سے پوچھا گیا کہ ملکی خزانے کو اربوں روپے کا نقصان ہوا اس کا تعین کون کرے گا؟

کامران علی افضل نے کہا کہ گندم سکینڈل کے اوپر میڈیا کا جو رول ہے وہ بالکل غیر ذمہ دارانہ ہے،میڈیا افواہیں پھیلاتا ہے جو بہت بری بات ہے۔