نجی یونیورسٹی لمزمیں فیسوں میں اضافے پر طلبہ کااحتجاج،داخلی راستے بندکردیئے

لاہور یونیورسٹی آف مینجمنٹ سائنسز کی انتظامیہ نے ٹیوشن اور ہاسٹلز سمیت تمام مدوں میں فیس چالیس فیصد تک بڑھادی جس پر لمز کے طلبہ نے یونیورسٹی میں داخلے کا راستہ بند کر کے احتجاج کیا اور فیسوں میں اضافہ واپس لینے کا مطالبہ کیا۔

فیسوں میں حالیہ اضافے پر طلبہ اور والدین پریشانی کا شکار ہیں۔ اس اضافے کے بعد کئی طلبہ کا کہنا ہے کہ ان کے لیے اس یونیورسٹی میں تعلیمی سلسلہ برقرار رکھنا دشوار ہو گیا ہے۔

لمز یونیورسٹی میں طلبہ کونسل کے صدر حزیل خان کا کہنا ہے کہ وہ فیسوں میں ظالمانہ اضافے پر قانونی راستہ اختیار کریں گے۔

طلبہ کونسل کے رکن محمد علی نے کہا کہ فیسوں میں دو سے ڈھائی لاکھ اضافہ ناقابل برداشت ہے، اگر مہنگائی کو جواز بنا کر اضافہ کیا جا رہا ہے تو طلبہ اور ان کے والدین بھی مہنگائی سے متاثر ہیں۔

طلبہ نے بتایا کہ جب انہوں نے یونیورسٹی میں تعلیم کا آغاز کیا تھا تو چار سالہ تعلیم کا مجموعی خرچ پیتیس سے چالیس لاکھ تھا، اس اضافے کے بعد یہ خرچ ساٹھ لاکھ تک پہنچ گیا ہے، اس طرح فی سیمسٹر سوا لاکھ روپے کا اضافہ ہوا ہے