شوبز
حادثہ نشے کی وجہ سے نہیں ہوا تھا، میں گاڑی چلاتے ہوئے سو گئی تھی، نمرہ خان
پاکستانی معروف اداکارہ اور ماڈل نمرہ خان نے نشے کی حالت میں گاڑی چلانے کی افواہوں پر خاموشی توڑ دی۔
حال ہی میں اداکارہ نے فیشن میگزین کے پوڈکاسٹ میں شرکت کی جہاں انہوں نے شادی کے بعد طلاق اور ماضی میں پیش آنے والے خطرناک روڈ حادثے سمیت دیگر امور پر تفصیلی گفتگو کی۔
ایک سوال کا جواب دیتے ہوئے انہوں نے تصدیق کی کہ حادثے کے بعد جب ان کے خون کے نمونے لیے گئے تو دیگر ٹیسٹ کے ساتھ نشے کا ٹیسٹ بھی کیا گیا۔
انہوں نے بتایا کہ حادثہ اس قدر خوفناک تھا کہ یہ افواہیں گردش کرنے لگیں کہ میں شراب کے نشے میں ڈرائیونگ کر رہی تھی جس کی وجہ سے یہ حادثہ رونما ہوا۔
تاہم تمام ٹیسٹ کی رپورٹس نے ثابت کردیا کہ میں کسی قسم کے نشے میں نہیں تھی بلکہ گاڑی چلاتے ہوئے غشی کی کیفیت طاری ہوگئی تھی جس کی وجہ سے پتہ نہیں چلا کہ کب گاڑی چلاتے چلاتے سو گئی اور سر اسٹیئرنگ پر جاگرا اور ایک پیر ایکسیلیٹر پر تھا جس کی وجہ سے گاڑی کی رفتار 180 تک پہنچ گئی۔
انہوں نے مزید بتایا کہ گاڑی فوج کی جیپ سے ٹکرائی تھی، بعدازاں فوجیوں نے ہی انہیں ریسکیو کیا اور اسپتال لے گئے۔
نمرہ خان نے بتایا کہ اس حادثے کے بعد 4 دن وینٹ اور 19 دن تک کوما میں رہی، جسم کی کئی ہڈیاں ٹوٹ چکی تھیں اور آج بھی ٹانگ میں راڈ (سلاخ) ہے جس کی وجہ سے اکثر ایئر پورٹ پر مسئلہ بھی ہوتا ہے۔
اداکارہ نے کہا کہ اس حادثے میں زندہ بچ جانا کسی معجزے سے کم نہیں اور وہ بھی اس لیے کہ اس دن سفر پر نکلنے سے قبل صدقہ دے کر نکلی تھی اسی لیے بچ گئی ورنہ ڈاکٹروں نے جواب دے دیا تھا۔