نکاح کیس میں سزا کے خلاف عمران خان اور بشریٰ بی بی کی اپیلیں منظور، عدالت نے بری کردیا

نکاح کیس میں سزا کے خلاف بانی پی ٹی آئی عمران خان اور بشریٰ بی بی کی اپیلیں منظور کرلیں،عدالت نے بانی پی ٹی آئی اور بشریٰ بی بی کو دوران عدت نکاح کیس سے بری کردیا ۔ڈسٹرکٹ ایڈیشنل اینڈ سیشن جج افضل مجوکا نے محفوظ شدہ فیصلہ سنادیا ،اپیلیں منظور ہونے پر ٹرائل کورٹ کا فیصلہ کالعدم قرار دے دیا۔

سول جج قدرت اللہ نے بانی پی ٹی آئی عمران خان اور بشریٰ بی بی کو 7، 7 سال قید اور 5،5 لاکھ روپے جرمانے کا فیصلہ سنایا تھا،ایڈیشنل اینڈ سیشن جج افضل مجوکا نے آج ہی مرکزی اپیلوں پر فیصلہ محفوظ کیا تھا۔

عدالت نے 28 صفحات پر مشتمل تحریری فیصلہ جاری کیا،فیصلے میں کہا گیا کہ خاور مانیکا بانی پی ٹی آئی اور بشریٰ بی بی پر عدت کے دوران نکاح کا جرم ہونے کا الزام ثابت کرنے میں ناکام رہے،خاور مانیکا کے وکیل کے مطابق خاور مانیکا کو رجوع کے حق سے محروم رکھا گیا۔

تحریری فیصلے میں کہا گیا کہ جرح کے دوران خاور مانیکا نے خود تسلیم کیا کہ بانی پی ٹی آئی اور بشریٰ بی بی کے نکاح کی خبر انہیں دوسرے روز ہی مل چکی تھی،خاور مانیکا کو شکایت داخل کرنےکاخیال انہیں چھ سال بعد آیا؟