بشام حملہ پاکستان اور سٹرٹیجک پارٹنر چین کے درمیان اختلاف پیدا کرنے کی کوشش ہے، پاک فوج

پاک فوج کے شعبہ تعلقات عامہ ( آئی ایس پی آر) نے ایک بیان میں کہا ہے کہ پاکستان میں دہشت گردی کے حالیہ واقعات، خاص طور پر گوادر،تربت، اور بشام، بزدلانہ کارروائیاں ہیں جن کا مقصد داخلی سلامتی کی صورتحال کو غیر مستحکم کرنا ہے۔ مسلح افواج نے پہلی دو کوششوں کو کامیابی سے ناکام بنا دیا، بشام میں ہونے والے تازہ ترین واقعے میں 5 چینی شہریوں سمیت 6 بے گناہ شہری ہلاک ہوئے۔ پوری قوم اپنے چینی بھائیوں کے ساتھ یکجہتی کے ساتھ کھڑی ہے اور اس بزدلانہ کارروائی کی بلا امتیاز مذمت کرتی ہے۔

بیان میں مزید کہا گیا کہ پاکستان کی اقتصادی ترقی اور اس کے عوام کی فلاح و بہبود کے لیے اہم سٹریٹجک منصوبوں اور حساس مقامات کو ہماری ترقی کو روکنے اور پاکستان اور اس کے سٹریٹجک اتحادیوں اور شراکت داروں، خاص طور پر چین کے درمیان اختلاف پیدا کرنے کی شعوری کوشش کے طور پر نشانہ بنایا جا رہا ہے۔

بیان میں کہا گیا کہ بعض غیر ملکی عناصر اپنے ذاتی مفادات کے تحت پاکستان میں دہشت گردی کی مدد اور اس کی حوصلہ افزائی میں ملوث ہیں۔ یہ عناصر مسلسل دہشت گردی کے سرپرستوں کے طور پر بے نقاب ہو رہے ہیں۔

آئی ایس پی آر کے بیان میں کہا گیا کہ معصوم شہریوں، غیر ملکیوں اور مسلح افواج کے خلاف تشدد کی ایسی گھناؤنی کارروائیاں پاکستانی عوام، اس کی سیکورٹی فورسز اور ہمارے شراکت داروں کے ملک سے دہشت گردی کی لعنت کو جڑ سے اکھاڑ پھینکنے کے عزم کو پست نہیں کر سکتیں۔ پاکستان، دہشت گردی کے خلاف فرنٹ لائن ریاست کے طور پر، شاید واحد ملک ہے جو پوری استقامت اور ریاست کے مکمل عزم کے ساتھ بین الاقوامی دہشت گرد ادارے کا براہ راست مقابلہ کر رہا ہے۔

بیان میں کہا گیا کہ آہنی اتحادی چین کی غیر متزلزل حمایت کے ساتھ، ہم اس بات کو یقینی بنائیں گے کہ دہشت گردی کی براہ راست یا بالواسطہ مدد کرنے میں ملوث تمام افراد کو جوابدہ ٹھہرایا جائے اور ان کا مناسب انجام پایا جائے۔ ہم مل کر مصیبت اور برائی پر غالب آئیں گے۔