نگران وزیراعظم کو آج مفت بجلی استعمال کرنے والوں کی تفصیلات پیش کی جائیں گی

نگراں وزیراعظم انوار الحق کاکڑ نےاتوار کے روز  پاور ڈویژن کو ہدایت کی ہے کہ بجلی کے اضافی بلوں میں کمی کے لیے آئندہ 48 گھنٹوں میں ٹھوس اقدامات کیے جائیں۔

بجلی کے بلوں میں اضافے سے متعلق ہنگامی اجلاس کا پہلا دور اتوار ہوا جبکہ دوسرا آج (پیر) کو ہوگا۔

وزیراعظم کو جولائی کے بجلی کے بلوں میں اضافے پر تفصیلی بریفنگ دی گئی۔ وزیراعظم نے کہا کہ جلد بازی میں کوئی ایسا اقدام نہیں کیا جائے گا جس سے ملک کو نقصان پہنچے، ایسے اقدامات اٹھائے جائیں گے جس سے قومی خزانے پر بوجھ نہ پڑے اور صارفین کو سہولت میسر ہو۔

انہوں نے مزید کہا کہ یہ ممکن نہیں کہ عام آدمی بوجھ میں ہو اور بیوروکریٹس اور وزیراعظم اپنے ٹیکسوں پر مفت بجلی استعمال کریں۔

وزیر اعظم نے کہا کہ متعلقہ وزارتیں اور متعلقہ ادارے مفت بجلی حاصل کرنے والے افسران اور اداروں کی تفصیلات فراہم کریں۔ انہوں نے کہا کہ وہ عام آدمی کی نمائندگی کرتے ہیں اور وزیراعظم ہاؤس اور پاکستان سیکرٹریٹ میں بجلی کی قیمت کو کم کیا جائے۔ انہوں نے مزید کہا کہ اگر آپ کو میرے کمرے کا اے سی بند کرنا ہے تو اسے ضرور بند کریں۔

بجلی کی بچت کے اقدامات پر عملدرآمد اور جولائی کے زائد بلوں کے معاملے پر بھی آج صوبائی وزرائے اعلیٰ سے تفصیلی مشاورت کی جائے گی۔

انہوں نے ہدایت کی کہ تقسیم کار کمپنیاں بجلی چوری روکنے کے لیے روڈ میپ پیش کریں اور مزید کہا کہ پاور سیکٹر میں اصلاحات اور قلیل، درمیانی اور طویل مدتی منصوبے جلد از جلد پیش کیے جائیں۔

وزیراعظم کی زیر صدارت جولائی کے مہینے میں بجلی کے زائد بلوں کے حوالے سے ہنگامی اجلاس کے پہلے دور میں عبوری کابینہ کے وفاقی وزراء شمشاد اختر، گوہر اعجاز، مرتضیٰ سولنگی، وزیراعظم کے مشیر ڈاکٹر وقار مسعود، سیکرٹری اطلاعات نے شرکت کی۔ اجلاس میں پاور، چیئرمین واپڈا، چیئرمین نیپرا اور دیگر متعلقہ اعلیٰ حکام نے شرکت کی۔