چیف جسٹس پشاور ہائیکورٹ نے رات 9 بجے اسلام آباد سے آکر زرتاج گل کی ضمانت منظور کی

پشاور ہائیکورٹ نے پی ٹی آئی کی رہنما زرتاج گل کی راہداری ضمانت منظور کر لی، عدالت نے زرتاج گل کو فوری رہا کرنے کا حکم دیتے ہوئے پولیس کو گرفتاری سے روک دیا۔

چیف جسٹس جسٹس محمد ابراہیم خان نے ریمارکس دیئے کہ اگر کسی کو انصاف نہیں دے سکتا تو مجھے استعفے دیناچاہئے، اگر میں نہ پہنچتا تو کیا یہ عورت ساری رات ہائی کورٹ میں گزارتی

پی ٹی آئی کی رہنما زرتاج گل کے راہداری ضمانت کیس کی سماعت پشاور ہائیکورٹ کے چیف جسٹس جسٹس محمد ابراہیم خان نے کی، اس سے قبل زرتاج گل نے بغیر ضمانت جانے سے انکار کر دیا تھا جبکہ ان کی گرفتاری کے لئے پولیس عدالت کے باہر موجود رہی جس پر چیف جسٹس پشاور ہائیکورٹ جسٹس محمد ابراہیم رات 9 بجے ہائی کورٹ آئے اور فوری طور پر کیس کی سماعت شروع کرتے ہوئے راہداری ضمانت منظور کر لی۔

 چیف جسٹس جسٹس محمد ابراہیم خان نے ریمارکس دیتے ہوئے کہا کہ آج پشاور ہائی کورٹ میں کیا کچھ ہو رہا تھا کہ مجھے اسلام آباد سے آنا پڑا، اگر کسی کو انصاف نہیں دے سکتا تو مجھے استعفے دیناچاہئے، اگر میں نہ پہنچتا تو کیا یہ عورت ساری رات ہائی کورٹ میں گزارتی، آج گیٹ کے باہر میرے 22 گریڈ آفیسر رجسٹرار کی بے عزتی ہوئی ہے، کیا آپ پولیس میں 22 گریڈ آفیسر ہے؟۔

اس موقع پر سکیورٹی کے سخت انتظامات کئے گئے تھے، عدالت کے باہر پولیس کی بھاری نفری تعینات رہی اور میڈیا سمیت کسی کو اندر جانے کی اجازت نہیں دی گئی، کیس کی سماعت کے دوران عدالت کے مین گیٹ کو اندر سے تالا لگا کر بند کر دیا گیا جبکہ عدالت کے طلب کرنے پر سی سی پی او اور ایس ایس پی آپریشنز کو اندر جانے دیا گیا۔

زرتاج گل عدالت سے ضمانت کا حکم جاری ہونے کے دو گھنٹے بعد تک عدالت میں ہی موجود رہیں، پی ٹی آئی کی کچھ خواتین ورکرز کا کہنا تھا کہ زرتاج گل کچھ دیر تک میڈیا سے بات چیت کریں گی تاہم اس کے برعکس وہ میڈیا سے بات چیت کئے بغیر ہی عدالت کے دوسرے دروازے سے چلی گئیں۔