ہائیکورٹ نے آئی جی اسلام آباد کو 25 ہزار جرمانہ کردیا

سابق وزیر برائے انسانی حقوق شیریں مزاری کا نام ای سی ایل سے نام نکلوانے کے درخواست پر تحریری فیصلے میں اسلام آباد ہائیکورٹ نے آئی جی اسلام آباد پر 25 ہزار روپے جرمانہ عائد کر دیا۔

اسلام آباد ہائیکورٹ کے جسٹس طارق محمود جہانگیری نے تین صفحات پر مشتمل تحریری آرڈر میں بتایا کہ عدالت کی جانب سے بار بار حکم کے باوجود جواب جمع نہ کرائے جانے پر جرمانہ عائد کیا گیا۔

اسلام آباد ہائیکورٹ نے حکم دیا کہ آئندہ سماعت سے قبل آئی جی 25 ہزار روپے درخواست گزار شیریں مزاری کو دیں۔ ہائیکورٹ نے آئی جی اسلام آباد کو دو اگست کو ایک ہفتے میں جواب جمع کرانے کا حکم دیا مگر 10 اگست تک جواب جمع نہیں کرایا گیا۔

اس موقع پر عدالت نے ایک ہفتے کی مہلت کی استدعا منظور کی تھی۔ پھر 29 اگست کو دوبارہ آئی جی اسلام آباد نے جواب جمع نہیں کرایا جس پر ہائیکورٹ نے 25 ہزار روپے جرمانہ عائد کیا۔

عدالتی حکم میں کہا گیا ہے کہ آئی جی جواب جمع نہ کرائے جانے پر انکوائری کرائیں، انکوائری کر کے ایکشن لے کر دو ہفتے میں جواب جمع کرائیں۔