اسرائیلی خفیہ ایجنسی کا ایران کے اندر آپریشن کر کے حملہ ناکام بنانے اور منصوبہ ساز گرفتار کرنے کا دعویٰ

اسرائیل کی خفیہ ایجنسی موساد نے ایران کی سرزمین پر خفیہ آپریشن کر کے اسرائیلی مفادات پر حملے کا منصوبہ ناکام بنانے اور حملہ آوروں کے سربراہ کو پکڑنے کا دعویٰ کیا ہے۔

اسرائیلی خفیہ ایجنسی موساد نے ایک بیان میں کہا کہ ایرانی زمین پر ایک منفرد آپریشن میں موساد نے ایک سیل کے سربراہ کو پکڑا اور دوران تفتیش قبرص میں اسرائیلی کاروبار پر حملے کا منصوبہ ناکام بنا دیا۔

اسرائیلی موساد نے یہ واضح نہیں کیا کہ آپریشن کب کیا گیا اور پکڑا گیا منصوبہ ساز اب کہاں ہے اور قبرص میں حملہ کب کیا جانا تھا۔ اسرائیلی وزیراعظم نے بھی اتوار کو کہا تھا کہ قبرص میں ایک حملہ ناکام بنایا گیا لیکن تفصیلاب انہوں نے بھی نہیں بتائی تھیں۔

قبرص نے اسرائیل کے ان دعووں پر کوئی تبصرہ نہیں کیا۔

اسرائیلی ایجنسی نے پکڑے گئے منصوبہ ساز کا نام شہباز عباس علی بتایا اور کہا کہ منصوبہ ساز ایران کے پاسداران انقلاب کی اعلیٰ قیادت سے ہدایات وصول کرتا تھا۔

اسرائیلی وزیراعظم کے دفتر نے ایران میں آپریشن کے دوران  پکڑے گئے منصوبہ ساز کی ویڈیو بھی جاری کی جس میں وہ اپنے رابطوں کی تفصیل بتا رہا ہے۔