پارلیمانی پارٹی نے عمر ایوب کا استعفیٰ مسترد کردیا،ارکان کا قیادت کی کارکردگی پر تحفظات کا اظہار

پی ٹی آئی اور سنی اتحاد کونسل کی پارلیمانی پارٹی اجلاس میں اختلافات کی گونج سنائی دی ۔ذرائع کے مطابق عمر ایوب اور بیرسٹر گوہر کی موجودگی میں ارکان نے قیادت کی کارکردگی پر تحفظات کا اظہار کردیا۔جبکہ پی ٹی آئی پارلیمانی پارٹی نے عمر ایوب کا بطور سیکرٹری جنرل استعفی مسترد کردیا۔

ذرائع کا کہنا ہے کہ پارلیمانی پارٹی نے بانی پی ٹی آئی کو استعفی منظور نہ کرنے کیلئے پیغام بھیجنے کا فیصلہ کیا ہے،،اجلاس میں آپسی اختلافات ختم کرنے پر زوردیاگیا۔ارکان کاکہناتھاکہ پنجاب اور خیبرپختونخوا کے ممبران کو آپس میں لڑایا جارہا ہے،شیر افضل مروت کو شیخ وقاص کے سامنے لاکر اختلافات پیدا کیےجا رہے ہیں۔

ذرائع کا کہنا ہے کہ بیرسٹر گوہر علی، عمر ایوب اور زرتاج گل نے اختلافات کے خاتمے کی کوششوں پر اتفاق کیا، ارکان نے رائے دی کہ پارلیمانی پارٹی اجلاس میں غیر متعلقہ تمام افراد کا داخلہ روکا جائے،اجلاس میں موبائل یا کیمرہ استعمال ہوتا ہےاور خبریں باہر جاتی ہیں۔

ایک رکن نے انکشاف کیاکہ عمر ایوب کے استعفا دیتے ہی متبادل پنجاب سے لانے کی کوششیں شروع ہو گئیں۔