قومی اسمبلی کا مختصر ترین اجلاس، آصفہ بھٹو کے حلف اٹھاتے ہی کورم کی نشاندہی پر ملتوی

صدر مملکت کی صاحبزادی آصفہ بھٹو نے رکن اسمبلی کا حلف اٹھا لیا، اٹھارہ منٹ کی کارروائی کے دوران حلف اٹھاتے ہی آصفہ بھٹو ایوان سے روانہ ہوئیں تو پیپلز پارٹی نے کورم کی نشاندہی کردی۔

پاکستان پیپلز پارٹی کے رکن عبدالقادرپٹیل نے کورم کی نشاندہی کرکے اجلاس ملتوی کرادیا۔

پیپلز پارٹی کی رہنما اور بلا مقابلہ منتخب ہونے والی رکن آصفہ بھٹو زرداری رکن نے قومی اسمبلی کی رکنیت کا حلف  اٹھایا۔اسپیکر ایاز صادق نے ان سے حلف لیا۔

پہلی بار رکن قومی اسمبلی بننے والی آصفہ بھٹونے رکن قومی اسمبلی رکنیت کا حلف اٹھا لیا اور اس کے فوراً بعد ایوان سے چلی گئیں۔

اپوزیشن کی ریکوزیشن پر بلائے گئے اجلاس میں اسپیکر قومی اسمبلی ایاز صادق نے اجلاس شروع ہوتے ہی آصفہ بھٹو کو حلف اٹھانے کی دعوت دی، اپوزیشن کی نعرہ بازی اور جعلی مینڈیٹ کے شور میں آصفہ بھٹو نے حلف اٹھایا۔

ایوان میں دہشت گردی اور حادثات میں انتقال کرجانے والوں کےلئے فاتحہ خوانی کی گئی اس کے بعد پیپلزپارٹی کے ہی عبدالقادر پٹیل نے کورم کی نشاندہی کردی۔

گنتی ہوئی تو کورم پورا نہیں تھا جس پر اسپیکرقومی اسمبلی نے اجلاس غیر معینہ مدت کےلئے ملتوی کردیا،ایازصادق نے ریمارکس دیئے کہ یہ اجلاس ریکوزیشن پر بلایا گیا تھا۔

آصفہ بھٹو کی حلف برداری کے موقع پرصدرمملکت آصف زرداری، بختاور بھٹو زرداری اور ان کے شوہر بھی قومی اسمبلی کی گیلری میں موجود تھے۔