ملک میں وہ وقت آگیا ہے جب کوئی بھی وزیراعظم بننے کو تیار نہیں، مفتاح اسماعیل

سابق وزیر خزانہ مفتاح اسماعیل کہتے ہیں موجودہ صورت حال میں حکومت بنانا زہر کا گھونٹ پینے کے مترادف ہے وہ وقت بھی آگیا ہے جب کوئی وزیر اعظم بننے کے لئے تیار نہیں ہے۔میری خواہش ہے تحریک انصاف کو شامل کرکے قومی حکومت بنائی جائے ورنہ حکومت کمزور ہوگی اس بار بھی نہیں لگتا وزیر اعظم مدت پوری کرے۔

کراچی میں لٹریچر فیسٹول میں شرکت کے بعد میڈیا سے گفتگو میں مفتاح اسماعیل نے کہا کہ میری دعا ہے جو بھی حکومت بنے معیشت ٹھیک کرے، آئی ایم ایف سے ڈیل کرکے عوام کو ریلیف دے، مشکل ضرور ہے لیکن بعد میں سب ٹھیک ہو جائے گا۔

انہوں نے کہا کہ میری خواہش ہے کہ تحریک انصاف کے ساتھ ملکر قومی حکومت بنائی جائے ان کے بغیر ٹوٹی پھوٹی حکومت ہوگی جو زیادہ دیر نہیں چل سکتی۔

ایک سوال کے جواب میں کہا کہ شاہد خاقان کہتے تھے ملک میں ایک وقت آئے گا کوئی وزیر اعظم بننے کے لئے تیار نہیں ہوگا ، اب وہ وقت بھی آگیا حکومت بنانا ایسا ہے جیسے زہر کا گھونٹ پیا جائے اگر شہباز شریف وزیر اعظم بنتے ہیں تو اللہ کرے وہ کامیاب ہوں۔