وقت آ گیا ہے کہ اب فیصلہ کر لیں کوئی گڈ یا بیڈ طالبان نہیں ہوگا، ہتھیار اٹھانے والوں کو جواب دیں گے، بلاول

پیپلز پارٹی کے چیئرمین اور سابق وزیر خارجہ بلول بھٹو زرداری نے کہا ہے کہ وقت آگیا ہے کہ فیصلہ کریں اب پاکستان میں کوئی گڈ طالبان اور بیڈ طالبان نہیں ہوگا، صرف ان کو معاف کرسکتے ہیں جو پاکستان کے آئین کو مانتے ہیں۔

راولپنڈی کے لیاقت باغ میں انتخابی جلسے سے خطاب کرتے ہوئے بلاول بھٹو زرداری نے کہا کہ میں اسی شہر میں موجود ہوں جہاں ذوالفقار علی بھٹو کو شہید کیا گیا،آج پھر پاکستان خطرے میں ہے، ایک طرف معاشی دوسری طرف جمہوری بحران ہے،دہشت گرد ایک بار پھر سر اٹھا رہےہیں،یہ دھرتی آپ کو پکار رہی ہے مجھے پکا ر رہی ہے کہ میں خطرے میں ہوں،پیپلز پارٹی نفرت اور تقسیم کی سیاست کو ہمیشہ کیلئے ختم کردیگی،میں اس جگہ کھڑا ہوں جہاں بینظیر بھٹو نے اپنی آخری تقریر کی تھی،اس ملک کو صرف اور صرف پاکستان پیپلز پارٹی ہی بچا سکتی ہے۔

سابق وزیرخارجہ نے کہا کہ نفرت،تقسیم، ذاتی انتقام کی سیاست کی وجہ سے جمہوری بحران پیدا ہوا،نفرت اور تقسیم کی سیاست کو ہمیشہ کیلئے ختم کردیں گے،وقت آگیا ہے کہ فیصلہ کریں اب پاکستان میں کوئی گڈ طالبان اور بیڈ طالبان نہیں ہوگا،صرف ان کو معاف کرسکتے ہیں جو پاکستان کے آئین کو مانتے ہیں،کسی نے پاکستان کے خلاف ہتھیار اٹھائے تو منہ توڑ جواب دینگے۔

بلاول بھٹو زرداری نے کہا کہ ایک جماعت وہی پرانی سیاست کررہی ہے جس سے وہ توبہ کرچکی تھی،ووٹ کے صحیح استعمال سے آپ چوتھی بار کی سازش ناکام بنا سکتے ہیں، آپ نے 8 فروری کو ووٹ دینا ہے، تیر پر مہر لگانا ہے،ن لیگ کے کارکنوں کو سمجھائیں یہ وہ ن لیگ نہیں رہی،پی ٹی آئی کے کارکنوں کو سمجھائیں ہم تین نسلوں سے مقابلہ کررہے ہیں۔

بلاول بھٹو زرداری نے کہا کہ پی ٹی آئی کو انتخابی نشان نہیں ملا یہ ان کا اپنا قصور ہے،پی ٹی آئی والے بغیر تیاری کے عدالت چلے جاتے ہیں پھر آنسو بہاتے ہیں۔