اسلام آباد پولیس کے تین افسر نئے آئی جی علی ناصر رضوی سے سینئر، ماتحت کام کرنے سے گریزاں

نئے آئی جی اسلام آباد کی تعیناتی کا معاملہ تنازع کا شکارہوگیا،جونیئر افسر کی بطور آئی جی اسلام آباد تعیناتی حکومت کے گلے پڑ گئی۔سابق آئی جی اکبر ناصر نے عہدے کا چارج چھوڑ دیا، نئے تعینات ہونے والے آئی جی  علی ناصر رضوی تاحال جوائننگ نہ دے سکے،نئے آئی جی علی ناصر رضوی نے بطور ڈی آئی جی آپریشنز لاہور عہدے کا چارج نہیں چھوڑا۔

ذرائع کا کہنا ہے کہ جونیئر آفیسر کی بطور آئی جی اسلام آباد تعیناتی سے اسلام آباد پولیس کے سینئر افسران تذبذب کا شکارہیں،ڈی آئی جی سیف سٹی خرم جانباز اور ڈی آئی جی ہیڈ کوارٹرز حسن رضا خان نئے آئی جی سے ایک سال سینئر ہیں۔

ذرائع نے بتایا کہ ڈی آئی جی سکیورٹی محمد اویس نئے تعینات ہونے والے آئی جی اسلام آباد سے 2سال سینئر ہیں،نئے تعینات ہونے والے آئی جی اسلام آباد کا تعلق پولیس سروس کے 31 ویں کامن سے ہے۔

ذرائع نے کہا کہ ڈی آئی جی سیف سٹی اور ڈی آئی جی ہیڈکوارٹرز کا تعلق 30 ویں کامن سے ہے، ڈی آئی جی سکیورٹی ملک اویس کا تعلق پولیس سروس کے 29ویں کامن سے ہے۔

ذرائع نے کہا کہ تینوں سینئر افسران جونیئر افسر کے ماتحت کام کرنے سے گریزاں ہیں،تینوں افسران کی جانب سے رخصت کی درخواست دیئے جانے کا امکان ہے۔