پنجاب میں یونین کونسلز کی نئی حد بندی ہوگی، نئے لوکل گورنمنٹ ایکٹ کا مسودہ تیار

پنجاب حکومت نے صوبے بھر کی یونین کونسلز کی تشکیل نو کا فیصلہ کیا ہے،اب پنجاب بھر کی یونین کونسلز 15 ہزار کی بجائے 20 ہزار نفوس پر مشتمل ہونگی،پنجاب حکومت نے نئے لوکل گورنمنٹ ایکٹ کا مسودہ تیار کر لیا۔

مجوزہ ایکٹ کے تحت پنجاب میں 455لوکل گورنمنٹس بنائی جائیں گی،الیکشن کمیشن نے پنجاب حکومت سے بلدیاتی انتخابات سے متعلق جواب طلب کررکھا ہے۔

سیکرٹری بلدیات پنجاب میاں شکیل کی جانب سے نئے لوکل گورنمنٹ ایکٹ کا مسودہ آج الیکشن کمیشن میں جمع کروایا جائے گا،الیکشن کمیشن نے پنجاب حکومت کو بلدیاتی انتخابات کروانے سے متعلق ہدایات جاری کررکھی ہیں۔

وزیر اعلی پنجاب مریم نواز کی سربراہی میں صوبائی کابینہ نے لوکل گورنمنٹ ایکٹ سے متعلق کمیٹی قائم کی ہے۔