یوکرین کے نامزد وزیر دفاع رستم عمروف کون ہیں؟

صدر ولادیمیر زیلنسکی نے یوکرین کے نجکاری کے مرکزی ادارے کے سربراہ رستم عمروف کو حالت جنگ کے میں وزیر دفاع نامزد کیا ہے۔ عمروف کی تقرری سے قبل پارلیمنٹ سے منظوری ضروری ہے۔

اولیکسی رزنیکوف کی جگہ وزیر دفاع مقرر ہونے والے رستم عمروف کون ہیں؟
41 سالہ عمروف کریمیا کے تاتار ہیں، بحیرہ اسود کے یوکرائنی جزیرہ نما کے ترک باشندے ہیں، کریمیا کو روس نے 2014 میں ضم کر لیا تھا۔ وہ ازبکستان کے سمرقند میں ایک کریمیائی تاتار خاندان میں پیدا ہوئے، اس خاندان کو1940 کی دہائی میں اس وقت کے سوویت کریمیا سے جلاوطن کر دیا گیا تھا۔

2020 سے، عمروف کریمیا پر قبضے کو ختم کرنے کی حکمت عملی پر کام کرنے والی یوکرین کی حکومت کی ٹاسک فورس کے رکن ہیں۔

ستمبر 2022 میں، عمروف، جو اس وقت یورپ نواز پارٹی کے ایک قانون ساز تھے، اسٹیٹ پراپرٹی فنڈ کے سربراہ بنے، جو کہ نجی سرمایہ کاروں کو ریاستی اثاثے فروخت کرنے والی ایجنسی ہے۔ انہیں ایک ایسے ادارے کو تبدیل کرنے کا سہرا دیا جاتا ہے جو اکثر بدعنوانی کے اسکینڈلز میں پھنسا رہا ہے۔ اس نے جنگ کے دوران ریاست کے لیے ریکارڈ آمدنی میں اضافہ کرتے ہوئے ریاستی املاک کی فروخت کو بھی دوبارہ شروع کیا۔

عمروف، جنہیں ان کے قریبی لوگ ایک باصلاحیت مذاکرات کار کے طور پر بیان کرتے ہیں، یوکرین کی اس ٹیم کے رکن تھے جس نے ، روس کے حملے کے ایک ماہ بعد مارچ 2022 میں روس کے ساتھ مذاکرات کیے تھے۔ انہوں نے بحیرہ اسود کے اناج کے معاہدے اور قیدیوں کے تبادلے پر بات چیت میں بھی حصہ لیا، جن میں یوکرین کے ازوف جنگجو بھی شامل تھے جو 2022 میں جنوبی شہر ماریوپول کی لڑائی کے دوران پکڑے گئے تھے۔ وہ مئی میں زیلنسکی کے سعودی دورے کے دوران وفد کے رکن تھے اور مارچ میں متحدہ عرب امارات کے دورے کے دوران خاتون اول اولینا زیلنسکا کے ساتھ تھے۔

عمروف نے اپنے کیریئر کا آغاز نجی شعبے میں کیا۔ انہوں نے 2004 میں یوکرین کے معروف موبائل آپریٹرز میں سے ایک میں شمولیت اختیار کی۔ 2013 میں انہوں نے اپنی سرمایہ کاری کمپنی اور فاؤنڈیشن قائم کی۔ انہوں نے معاشیات میں بیچلر ڈگری اور فنانس میں ماسٹرز کیا ہے۔