الیکشن کون لڑےگا، فیصلہ عوام نے کرنا ہے، سپریم کورٹ، 9 مئی کے مقدمات میں مفرور عمر اسلم کو الیکشن لڑنے کی اجازت

سپریم کورٹ نے پی ٹی آئی کے رہنما عمر اسلم اعوان اور طاہر صادق کو انتخابات لڑنے کی اجازت دے دی۔ جسٹس اطہر من اللہ نے ریمارکس دیے کہ الیکشن کون لڑے گا کون نہیں؟ فیصلہ عوام نے کرنا ہے الیکشن کمیشن نے نہیں ،ملک کے عوام کو فیصلہ کرنے دیں۔

این اے 87 خوشاب سے پی ٹی آئی رہنما عمر اسلم  اور این اے 49 اٹک سے طاہر صادق  کے کاغذات نامزدگی مسترد ہونے کے خلاف اپیلوں کی سماعت  جسٹس منصور علی شاہ کی سربراہی میں قائم تین رکنی بنچ نے کی۔

عمر اسلم اعوان کی اپیل کی سماعت شروع ہوئی توعدالت نے کہا کہ مفرور ہونے کی بنیاد پر کسی کو انتخابات لڑنے سے نہیں روکا جا سکتا،الیکشن لڑنا بنیادی حق ہے۔ مفرور شخص الیکشن نہیں لڑ سکتا بتا دیں کہاں لکھا ہے، بغیر قانون کسی کو بنیادی حق سے کیسے محروم کیا جا سکتا ہے۔

جسٹس اطہر من اللہ نے کہا کہ الیکشن لڑنا بنیادی حق ہے ،الیکشن کون لڑے گا کون نہیں فیصلہ عوام نے کرنا ہے،عوام کے حقوق متاثر ہو رہے ہیں ،احتساب عوام نے کرنا ہے الیکشن کمیشن نے نہیں۔

عمر اسلم اعوان کے نو مئی کے مقدمات میں مفرور ہونے کی بنیاد پر کاغزات نامزدگی مسترد کئے گئے تھے۔

عدالت نے پی ٹی آئی کے رہنما طاہر صادق کو بھی حلقہ این اے 49 اٹک سے انتخابات لڑنے کی اجازت دے دی ہے۔طاہر صادق نے لاہور ہائیکورٹ کے فیصلے کے خلاف سپریم کورٹ سے رجوع کیا تھا۔