پاکستان
کم سن عبداللہ نوید کے فائٹر پائلٹ بننے کے خواب کو ایک دن کے لیے تعبیر مل گئی
تھیلیسمیا کے مرض میں مبتلا ایک ذہین بچے عبداللہ نوید فائٹر پائلٹ بننے کا خواب رکھتا ہے، پاک فضائیہ نے اس کے اس خواب کو ایک دن کی تعبیر دے دی۔
پاک فضائیہ کے سربراہ ایئر چیف مارشل ظہیر احمد بابر سدھو نے انتہائی شفقت کا مظاہرہ کرتے ہوئے 9ویں جماعت کے طالب علم، 16 سالہ عبداللہ نوید کے پائلٹ بننے کے خواب کو تعبیر دی۔ ترجمان پاک فضائیہ کے ترجمان نے بتایا کہ فائٹر پائلٹ بننے کا عبداللہ نوید کا خواب دراصل پاک فضائیہ کے ساتھ پوری پاکستانی نوجوان نسل کی روایتی وابستگی کا مظہر ہے۔پاک فضائیہ کے آپریشنل بیس پر ایک دن کے لیے عبداللہ نوید کو پائلٹ بنایا گیا۔
میک اے وش فاؤنڈیشن پاکستان کے تعاون سے عبداللہ نوید نے پی اے ایف کے ایک آپریشنل بیس کا دورہ کیا جہاں انہیں ایئر آفیسر کمانڈنگ، سدرن ایئر کمانڈ، ایئر وائس مارشل خالد محمود اور بیس کمانڈر ایئر کموڈور عاصم رانا نے اعزازی رینک لگائے۔ عبداللہ نوید کو پاک فضائیہ کے لڑاکا طیارے میں بٹھایا گیا اور بیس کے مختلف یونٹس کا دورہ بھی کروایا گیا۔
عبداللہ کے والدین اور میک اے وش فاؤنڈیشن کے منتظم اعلیٰ اشتیاق بیگ بھی عبداللہ نوید کے ساتھ تھے۔عبداللہ نے اس منفرد اور بے مثال تجربے پر انتہائی مسرت کا اظہار کیا اور سربراہ پاک فضائیہ کا خصوصی شکریہ ادا کیا۔
ترجمان پاک فضائیہ نے کہا کہ پوری پاکستانی قوم کے دلوں میں ایک خاص مقام رکھتی ہے اور پوری قوم کے ہمراہ عبداللہ نوید کی جلد صحت یابی اور انکے خواب کی تعبیر کے لیئے نیک خواہشات کا اظہار کرتی ہے۔