کالم
طاقت کا سرچشمہ؟
![](https://urduchronicle.com/wp-content/uploads/2023/05/crowd-people-1.png)
جنرل ایوب خان کی کابینہ میں تجارت اور امور خارجہ کی وزارتیں انجوائے کرنے کے بعد سندھ کے بڑے وڈیرے نے ماؤکیپ پہن لی۔ جناب ذوالفقار علی بھٹو نے ڈاکٹر مبشر حسن، اے رحیم، مختار رانا جیسے ترقی پسندوں کو سمیٹ کر پاکستان پیپلز پارٹی کی بنیاد رکھی، پہلا ستون تھا،طاقت کا سرچشمہ عوام ہیں۔دوسرا نعرہ تھا، روٹی کپڑا اور مکان۔ بھوک سے بلبلاتے لوگوں، دفاتر کے باہر دربان کے اشارے کے منتظر لاچاروں نے لاڑکانہ کے افق سے ابھرتا نیا سورج دیکھا۔ تب، 22 خاندان ہوں یا ملکی سیاست کے بانیان، اچے برج! سب الٹ گئے۔ یہ تھا پیٹ کی آگ، بھوک کا وار۔
پچھتر سال بعد، آج پھر حکمران طاقت کا سرچشمہ کون، کی بحث میں الجھے ہوئے ہیں۔ ہوس اقتدار ہے، تصادم کے جذبات بھڑک رہے ہیں۔ بالادست طبقات، جو ہیں آئین کے ستون، وہی آئین، آئین کھیل رہے ہیں۔ چند روز قبل خبر تھی ۔۔ٹھٹھہ میں مفلسی نے 41 افراد کو نگل لیا۔
ایک اور خبر تھی: ایک ہی دن میں 6 خواتین نے زہر کھا لیا۔ 3 ہلاک، 3 کو بچا لیا گیا۔ میں کانپ اٹھا، زہر کی گرانی کے دور میں کہیں ان 6 خواتین پر اسراف کا مقدمہ نہ بن جائے۔
یکم اپریل سے، قومی اسمبلی میں ایک رکن سائرہ بانو کے سوا کسی کے لبوں پر 23 کروڑ افراد کی فریاد نہیں سنی۔ بھوک مٹانے، روزگار بڑھانے والا ایک بل پاس نہیں ہوا۔ گونج ہے تو بس، اقتدار کی، طاقت کے سرچشمے کی۔ مسند شاہی کیلئے سر شام پیش ہونے والا بل، اگلی شام ڈھلنے سے پہلے صدر کی میز پر تھا۔ صدر کا استرداد، سپریم کورٹ کا پیشگی حکم امتناعی گیا بھاڑ میں! بل قانون بن گیا۔
آئین کی 25 شق تڑپتی رہ گئی، کب ملے گی تعلیم سب کو؟ بلوچستان میں 70 فیصد خواتین صرف انگوٹھے لگا سکتی ہیں۔
کب جاگیں گی آئین میں عوامی حقوق کی شقیں؟ اقتدار کے “رسہ کشوں” کی لگامیں کسنے والی شقیں، کب بنیں گے عوام طاقت کا حقیقی سرچشمہ؟
بھٹو مرحوم نے طاقت کا سرچشمہ عوام کو بنایا، اب، طاقت کانسٹی ٹیوشن ایونیو، اسلام آباد میں سمٹ آئی ہے۔ 342 اراکین میں سے، موجود اراکین جو کہہ دیں گے وہی نقارہ خلق ہو گا۔ 342 کا،ایوان کبھی کبھی تو دس منٹ بھی جاری نہیں رہتا۔ جس کام کیلئے بلایا جاتا ہے وہ کام زیر بحث آتا ہی نہیں۔
میں ملتمس ہوں، پاکستان کا آئین ہندوستانی آئین کا چربہ ہے، اسلام، ملکی حدود، حلف وغیرہ کی شقوں پر کاغذ رکھ دیا جائے، تو شاید کوئی پہچان ہی نہ سکے کہ آئین کس ملک کا ہے۔ میں حفیظ پیرزادہ مرحوم، محمود علی قصوری مرحوم، اور ان کے ساتھیوں پر کاپی رائٹ کی خلاف ورزی کا الزام نہیں لگا رہا، دو خطوں کے لیڈران کی سوچ میں ہم آہنگی ہو سکتی ہے۔ لیکن ہمارا آئین، ہندوستانی آئین کے برعکس، آمرانہ ہے۔ ہمارے آئین کا آرٹیکل 238 پارلیمنٹ کو “ناخدا” بنا دیتا ہے۔
لوگ پوچھتے ہیں، انڈہ پہلے یا مرغی؟ لیکن ہماری پارلیمنٹ اگر لکھ دے کہ انڈہ پہلے، تو جناب انڈہ پہلے۔ پارلیمنٹ اگر کہہ دے کہ، آج سپریم کورٹ کو تحلیل کیا جاتا ہے” تو آئین کی اس شق کے مطابق، سپریم کورٹ کا وجود ” صفحہ پاکستان” سے مٹ جائے گا۔
لیکن،چور جتنے مرضی دستانے پہن لے، کوئی نہ کوئی نشانی چھوڑ جاتا ہے۔ 1973ء کے آئین کے آرٹیکل 227 کے مطابق: ” قرآن و سنت کے منافی کوئی قانون نہیں بنایا جا سکتا”۔ پھر متعدد صفحات پر مشتمل باب دوم بھی ہے: “فنڈا مینٹل رائٹس اینڈ پرنسپلز آف پالیسی” اس میں پارلیمنٹ نے اپنی بالا دستی سرنڈر کر دی ہے۔ پارلیمنٹ نے تسلیم کیا کہ بنیادی انسانی حقوق اٹل ہیں، انہیں سلب کرنے کی اجازت نہیں۔ اس باب میں پارلیمنٹ کی حدود طے ہو گئیں۔ پچھلے دنوں یہ معاملہ ہندوستان میں دوبارہ اٹھا تھا۔ آئین کے تحفظ کی 50 ویں سالگرہ کے موقع پر۔ اقتدار کے نشے میں بدمست، اندرا حکومت نے مذہبی عبادت گاہوں کا کنٹرول سنبھال لیا تھا۔ کیسو آنند بھارتی نامی سنت 1971 میں سپریم کورٹ میں گئے۔ بالکل پاکستان جیسی صورتحال تھی۔ عدالت عظمی کے آدھے جج پارلیمنٹ کو طاقت کا سرچشمہ سمجھتے تھے۔ آدھے ججوں کے نزدیک، ” ڈاکٹرائن آف بیسک سٹرکچر” کی رو سے سپریم کورٹ نظر ثانی کرنے کی مجاز ہے۔
ہمارے آئین کے باب دوم میں بھی پارلیمنٹ کے اختیارات محدود ہیں، لا محدود نہیں۔ اس بات کا تعین کون کرے گا کہ پارلیمنٹ کے قوانین، طے کردہ اصول، کوئی قرارداد، باب دوم کی حد کے اندر ہے یا نہیں۔ اس کا تعین کون کرے گا کہ پارلیمنٹ نے اپنے اختیارات سے تجاوز کیا ہے یا نہیں۔ بھارتی سپریم کورٹ نے اندرا گاندھی حکومت کی دو ترامیم منسوخ کر دی تھیں۔ یہاں بھی باب دوم کی رو سے سپریم کورٹ پارلیمنٹ کے ہر قانون پر عمل درآمد کی مجاز ہے۔ خاص طور پر، ڈاکٹرائن آف بیسک سٹرکچر، پارلیمنٹ پر چیک قائم کرتا ہے۔ یہ ڈاکٹرائن ہے کیا؟ دراصل ہٹلر نے اپنے نظریے کی ترویج، خالص جرمن نسل کی اٹھان کے لیے عدالت میں بھی جرمن نسل پرست جج بٹھا دئیے تھے، آئین بھی نسل پرستوں کا محافظ تھا، اس میں بدلاؤ کے لیے ” سپریم کورٹ کے بنیادی اختیارات” کا فلسفہ دنیا بھر نے تسلیم کیا۔ ہم کسی “انڈے” میں قید نہیں، یہ فلسفہ ہمارے ہاں بھی مؤثر ہے۔ اسی فلسفے کے تحت لاہور ہائی کورٹ نے اپریل 1977ء میں لگائے گئے بھٹو مرحوم کے مارشل لاء کو کالعدم قرار دے دیا تھا۔ جج صاحبان کتنے اختیارات سرنڈر کرنا چاہتے ہیں، یہ ہر جج کی اپنی سوچ ہے۔ 1977ء میں بھی سندھ ہائی کورٹ نے کراچی اور حیدرآباد میں مارشل لاء برقرار رکھا تھا۔
اب پھر ہندوستان چلتے ہیں۔ ہندو سنت کے مقدمے پر سپریم کورٹ تقسیم تھی۔ شومئی قسمت، اندرا گاندھی کے حامی جج، ایچ ایم بیگ بیمار پڑ گئے۔ حکومت نے سماعت ملتوی کرنے کی استدعا کی۔ چیف جسٹس نے ٹھینگا دکھا دیا۔ یہ سنتے ہی بیگ صاحب بستر علالت سے اٹھ کر کرسی عدالت پر جا پہنچے۔ عددی کھیل میں اندرا گاندھی کو شکست ہوئی۔ 7 کے مقابلے میں 6 سے عدالت نے آئینی ترمیم کے اختیارات پر روک لگا دی۔ تاہم، خلاف فیصلہ دینے والے چیف جسٹس شری سکری کو بہت کچھ بھگتنا پڑا۔ اندرا گاندھی کے حق میں فیصلہ دینے والے تین جج اوپر تلے چیف جسٹس بنے۔ انصاف کی قیمت چکانا پڑتی ہے۔
پاکستان میں بھی آئین ہمارے مزاج کے مطابق نہیں۔ جنرل (ر) ضیاء الحق نے کہا تھا: آئین کیا ہے، 18 صفحات کا چیتھڑا ہے، جب چاہوں پھاڑ کے پھینک دوں۔ اس وقت، آئین کے محافظین اس نقطہ پر بہت کسمسائے تھے، مگر اب؟ اسحاق ڈار کی باتیں آئین شکنی سے بھی آگے ہیں۔ بہت آگے۔
ہمارے ہمسائے میں جی 20 کا اجلاس منعقد ہو رہا ہے، دنیا کے حکمران دورے کر رہے ہیں، دہشت گردی کے حوالے سے ہمارے خلاف گھیرا تنگ کیا جا رہا ہے۔ عالمی حالات سے، ارد گرد بنے جانے والے جال سے قطع نظر، ہماری اقلیتی حکومت اور “اقلیتی اپوزیشن” 21 ارب روپے کیلئے ماری ماری پھر رہی ہے۔ نا سمجھی کی بلندیوں کو چھو رہی ہے، حب الوطنی کا تقاضا ہے، طاقت کا سرچشمہ عوام ہیں، ان کے پاس جانے کے سوا کوئی حل نہیں۔
![](https://urduchronicle.com/wp-content/uploads/2024/01/urdu-chronicle-logo-header.png)
-
کھیل10 مہینے ago
ورلڈ کپ میں ٹیم کی بدترین کارکردگی، سری لنکا نے اپنا کرکٹ بورڈ برطرف کردیا
-
کھیل12 مہینے ago
کم عمر لڑکی کی سیکس ویڈیو بنانے اور شیئر کرنے پر ریئل میڈرڈ کے 3 کھلاڑی گرفتار
-
تازہ ترین4 مہینے ago
چیئرمین پی سی بی دو طرفہ سیریز پر بات کرنے آئرلینڈ پہنچ گئے
-
ٹاپ سٹوریز1 سال ago
آئی ایم ایف بورڈ سے معاہدہ منظور،1.2 ارب ڈالر کا فوری اجرا ممکن، باقی رقم دو سہ ماہی جائزوں سے مشروط
-
کالم1 سال ago
اسلام میں عبادت کا تصور
-
پاکستان4 مہینے ago
مریم نواز سے گورنر پنجاب کی ملاقات،صوبے کی ترقی کے لیے اہم امور پر تبادلہ خیال
-
تازہ ترین7 مہینے ago
بلا ٹرکاں والا سے امیر بالاج تک لاہور انڈر ورلڈ مافیا کی دشمنیاں جو سیکڑوں زندگیاں تباہ کرگئیں
-
پاکستان5 مہینے ago
پنجاب حکومت نے ٹرانسفر پوسٹنگ پر عائد پابندی ہٹالی