خیبر پختونخوا میں صحت کارڈ پر علاج کی سہولت ایک بار پھر بند

خیبرپختونخوا میں صحت کارڈ پر مفت علاج کی سہولت ایک مرتبہ پھر معطل کردی گئی، انشورنس کمپنی نے تمام ہسپتالوں کو آج سے نئے مریضوں کا داخلہ بند کرنے اور نجی ہسپتالوں میں زیر علاج مریض سرکاری ہسپتالوں میں منتقل کرنےکی ہدایت کردی۔

خیبرپختونخوا میں صحت کارڈ پر مفت علاج کی سہولت پھر بند ہوگئی ہے، انشورنس کمپنی نے تمام پینل ہسپتالوں کی انتظامیہ کو صحت کارڈ پر نئے مریض داخل کرنے سے روک دیا ہے۔

انشور نس کمپنی کی جانب سے صحت کارڈ کے پینل ہسپتالوں کو لکھے گئے مراسلے میں کہا گیا ہے کہ صحت کارڈ پلس کے تحت 22اگست سے نئے داخلے بند کئے جائیں اور پینل میں نجی ہسپتالوں میں صحت کارڈ پر زیر علاج مریضوں کو سرکاری ہسپتالوںمیں منتقل کیا جائے۔

مراسلے میں واضح کیا گیا ہے کہ ایمرجنسی صورتحال میں صحت کارڈ پر مفت علاج کا سلسلہ فی الحال جاری رہے گا اور اس مقصد کیلئے پینل ہسپتالوں میں ایمرجنسی مریضوں کی سہولت کےلئے صحت کارڈ کاونٹرز کھلے رکھے جائیں۔ تاہم او پی ڈی سے کسی مریضوں کا داخل نہ کیا جائے ۔