ایمان مزاری کی ضمانت منظور، علی وزیر کو جیل بھیج دیا گیا

تھانہ ترنول میں کار سرکار میں مداخلت سے  متعلق درج مقدمہ میں اسلام آباد کی مقامی عدالت نے ایمان  مزاری کی درخواست ضمانت منظور کر لی ،سابق رکن قومی اسمبلی علی وزیر کو جوڈیشل ریمانڈ پر اڈیالہ جیل بھیج دیا۔

ایمان مزاری اور  علی وزیر کے خلاف کارِسرکار میں مداخلت اور  سرکاری املاک کو نقصان پہنچانے کے کیس کی سماعت جوڈیشل مجسٹریٹ وقاص احمد نے کی۔دوران سماعت وکیل قیصر امام نے بتایا کہ ایمان مزاری سےتفتیش میں کچھ برآمد نہیں کیاگیا، کسی کو دھمکی دی نہ شیشے توڑے،مزید حراست میں رہنے کا کوئی جواز نہیں۔ایمان مزاری ایک خاتون ہیں، کھرا سچ بولنے کا مطلب نہیں کہ جیل میں رکھا جائے۔

پراسیکیورٹر عاطف الرحمن نے درخواست ضمانت کی مخالفت کرتے ہوئے کہا کہ ایمان مزاری نے ریاست کو گالیاں دیں، توڑپھوڑ ہوئی، ایمان مزاری کا کردار مقدمے میں واضح طور پر لکھا گیا ہے۔

پراسیکیورٹر عاطف الرحمن نے علی وزیر کے مزید جسمانی ریمانڈ کی استدعا کرتےہوئے کہا کہ ملزم پولیس کے ساتھ تفتیش کے معاملے پر تعاون نہیں کر رہے۔چند ثبوت برآمد بھی ہوئے۔

علی وزیر کے وکیل عطا اللہ کنڈی نے جسمانی ریمانڈ کی مخالفت کی۔ عدالت نے ایمان زینب مزاری کی درخواست ضمانت   30 ہزار کے ضمانتی مچلکوں کے عوض منظور کر لی جبکہ علی وزیر کو جوڈیشل ریمانڈ پر اڈیالہ جیل بھیج دیا۔