پاکستان
اٹلی کے بحری جنگی جہاز کی پاک بحریہ کی مشقوں میں شرکت
اطالوی جنگی بحری جہاز نے پاک بحریہ کے جہازوں اورپاک فضائیہ کے طیاروں کے ہمراہ دوطرفہ مشق میں شرکت کی۔
ترجمان پاک بحریہ کے مطابق اطالوی بحریہ کے جنگی جہازموروسینی ان دنوں پاکستان کے دورے پرہے، دورے کے دوران اطالوی جہاز نے پاک بحریہ کے جہازوں اور پاک فضائیہ کے طیاروں کے ہمراہ دوطرفہ بحری مشق میں شرکت کی۔
اطالوی جہاز کے ہمراہ اعلٰی عسکری قیادت اور دفاعی صنعت کے وفد نے بھی پاکستان کا دورہ کیا، اطالوی بحریہ کے ڈائریکٹر ملٹری پرسنل نے کمانڈر پاکستان فلیٹ سے ملاقات کی۔
ملاقات کے دوران باہمی دلچسپی کے امور اور مستقبل میں بحری شراکت داری پر تبادلہ خیال کیا گیا، اطالوی عسکری وفود اور بحری جہاز کے دورے سے دونوں ممالک کے مابین تعلقات کو مزید فروغ ملے گا۔