پاکستان
کراچی: قربانی کا جانور باڑے میں باندھنے پر جھگڑا، 25 سالہ نوجوان قتل
قربانی کا جانور باڑے میں باندھنے پر تلخ کلامی، چھریوں کے وار سے نوجوان قتل، واقعہ کراچی کے علاقے ملیر کھوکرا پار میں پیش آیا.
اہل خانہ کے مطابق پچیس سالہ نوجوان معیز نے قربانی کے لیے خریدا گیا جانور قریبی باڑے میں باندھ رکھا تھا، نوجوان اپنا جانور واپس لینے باڑے گیا تو باڑے والوں نے اضافی رقم طلب کی جس پر معمولی تلخ کلامی کے بعد مبینہ طور پر باڑے کے مالک اذان نے چھریوں کے وار کرکے نوجوان کو قتل کردیا اور موقع سے فرار ہوگیا۔
مقتول کے چچا کے مطابق معیز اضافی رقم کے تقاضے کو رد کرکے واپسی کے لیے بائک پر سوار ہونے لگا تو ملزم نے مقتول کو زمین پر گرا کر اسکے سینے پر چھری سے وار کیا، مقتول کو فوری طور پر قریبی نجی اسپتال لیجایا گیا جہاں سے اسے جناح اسپتال منتقل کیا جارہا تھا تو معیز راستے میں ہی دم توڑ گیا۔
مقتول تین بھائیوں میں دوسرے نمبر پر تھا ، پولیس کے مطابق واقعہ ذاتی دشمنی کا شاخسانہ لگتا ہے، ملزم اذان کی تلاش میں مختلف علاقوں میں چھاپے مارے جارہے ہیں