خیبرپختونخوا اسمبلی، فنانس بل 2024 پیش، پلاٹس، گھروں، نسوار اور تمباکو پر ٹیکس نافذ

خیبر پختونخوا اسمبلی کا اجلاس سپیکر بابر سلیم کی زیرصدارت شروع ہوا، اس دوران صوبائی وزیر خزانہ آفتاب عالم نے خیبرپختونخوااسمبلی میں فنانس بل 2024 ءاورتمباکوپرڈیوٹی لگانے سے متعلق ایکسائزبل پیش کیا۔

بل کے تحت ہاؤسنگ سوسائٹی میں پلاٹ کی خریدوفروخت پر2 فی صد ٹیکس اداکرناہوگا،ورجینیاٹوبیکو پر50 روپے فی کلو گرام یا انوائس کا تین فی صد ٹوبیکو سیس لاگو ہوگا،نسوار کے تمباکو پرساڑھے7روپے فی کلوگرام ٹیکس عائد کرنے کی تجویز ہے۔

صوبے میں پیداہونے والی کوئلے،نیفرائٹ،کرومائٹ اور گریفائٹ ٹیکس کے زمرے میں شامل ہوں گی، صوبے میں کاشتکاروں سے تمباکو خریدنے والی کمپنی اپنے آپ کوایکسائزکے محکمہ کیساتھ رجسٹرڈ کرے گی،5مرلہ سے کم گھر پر کسی قسم کاٹیکس لاگو نہیں ہوگا،5سے10مرلے پر3ہزار،15مرلہ پرساڑھے3ہزاراور18مرلہ پر4ہزارپراپرٹی ٹیکس عائد کر دیا گیا ہے۔

ایک کنال پر15ہزاراوردو کنال پر40ہزارکاٹیکس نافذ ہوگا،تعلیمی اداروں پرپرائمری سکول پر40ہزار،مڈل پر50 ہزاراور ہائی سکول پر1لاکھ سالانہ ٹیکس نافذہوگا،پرائیویٹ یونیورسٹی پرڈھائی لاکھ روپے ٹیکس کے نفاذکی تجویز ہے۔

انڈسٹریل ایریامیں صنعتی پلاٹ پر10ہزار روپے کافکسڈ ٹیکس نافذ ہوگا، سروس سٹیشن پر20ہزار پراپرٹی ٹیکس،پیٹرول اورسی این جی سٹیشن پر50ہزاراور موبائل فون ٹاورپر40ہزار روپے ٹیکس نافذکرنے کی تجویز ہے۔

موٹرسائیکل پرڈھائی ہزار روپے لائف ٹائم ٹوکن نافذ ہوگا، شادی ہال ٹیکس کی تین کٹیگری ہوگی،15سے 25ہزار تک کاٹیکس نافذہوگا،ٹریفک قوانین کی خلاف ورزیوں پر ٹریفک چالان میں اضافہ کر دیا گیا۔

موٹرسائیکل کی تیزرفتاری پرجرمانہ 120سے بڑھا کر5سو، موٹرکارکی تیزرفتاری پرجرمانہ 5سو سے بڑھاکر1ہزار روپے کردیاگیا،ٹریفک سگنل توڑنے پرموٹرسائیکل 5سواورموٹرکار 1ہزار روپے جرمانہ ہوگا،رانگ سائیڈ پرڈرائیونگ پر موٹرکارچالان 1ہزارسے بڑھاکر2ہزار کردیا،گاڑی کادروازہ غلط سائیڈ کھولنے پر جرمانہ 5سو روپے فکسڈ کردیا۔