یوم تکریم شہدا، گہرے پانیوں میں بھی پاک فوج زندہ باد کے نعرے

گہرے سمندرمیں بھی پاک فوج زندہ باد کےفلک شگاف نعرے،ماہی گیروں کی جانب سے کراچی میں سبزہلالی پرچموں کے ساتھ لانچ ریلی کا انعقاد کیاگیا۔

فشر مینز کوآپریٹو سوسائٹی کی جانب سے یوم تکریم شہداء اور پاک فوج سے اظہار یک جہتی کے لیے لانچ ریلی کا اہتمام کیا گیا۔لانچ ریلی میں ماہی گیروں نے بڑی تعداد میں شرکت کی۔سیکڑوں لانچوں کو قومی پرچموں سے سجایا گیا تھا۔لانچوں پر قومی اور ملی نغمے بجائے جا رہے تھے۔ماہی گیروں میں جوش اور ولولہ دیدنی تھا۔

لانچ ریلی کا آغاز کیماڑی جیٹی سے کیا گیا۔اس موقع پر ایڈمنسٹریٹر فشر مینز کوآپریٹو سوسائٹی زاہد ابراہیم بھٹی نے میڈیاسے بات چیت کرتے ہوئے کہا کہ ماہی گیر برادری اپنی پاک فوج سے اظہار یک جہتی کرتی ہے۔پاک فوج ہمارے سر کا تاج ہے۔پاک فوج سرحدوں پرپہرہ دے کر ہماری حفاظت کرتی ہے۔اورپاک فوج اپنی جانوں کا نذرانہ دے کرپاک وطن کی حفاظت کر رہی ہے۔

ایڈمنسٹریٹر زاہد ابراہیم بھٹی نے کہا کہ 9مئی کے روز کچھ ناعاقبت اندیش لوگوں نے وہ کچھ کر دکھایا۔جو کہ پاکستان کے دشمنوں کوآج تک اس کی جرات نہیں ہو سکی۔سیاست کی آڑ میں دہشت گردی اور درندگی کا مظاہرہ کیا گیا۔جس پر ماہی گیر برادری کے دل خون کے آنسو رو رہے تھے۔ماہی گیر برادری نے 1965کی جنگ ہو یا پھر1971 کی جنگ پاک فوج کے ساتھ ہراول دستے کا کردار ادا کیا تھا۔ماہی گیر برادری آج بھی پاک فوج کے ساتھ کندھے سے کندھا ملا کر کھڑی ہے۔اورپاک فوج کے ساتھ ہراول دستے کا کردار ادا کرتی رہے گی۔ماہی گیر برادری پاک فوج کی قربانیوں کو کبھی رائے گاں نہیں جانے دے گی۔ماہی گیر برادری پاک فوج کو سلام پیش کرتی ہے۔آج جوپاکستانی چین کی نیند سوتے ہیں۔وہ پاک فوج کی مرہون منت ہے۔9مئی کے روز دہشت گردانہ کرداروں کو کڑی سے کڑی سزا ملنی چاہئے۔تاکہ آئندہ کوئی بھی ایسی جرات نہ کرسکے۔