نیویارک پولیس نے سندھ پولیس کو ٹریننگ کی پیشکش کردی

نیویارک پولیس نے سندھ پولیس کو تربیت فراہم کرنے کی پیشکش کردی۔ نیویارک پولیس ڈیپارٹمنٹ کے وفد کی وزیر اعلی سندھ مراد علی شاہ سے ملاقات میں ایک دوسرے کے ساتھ تعاون بڑھانے پر اتفاق کیا گیا۔

وزیر اعلیٰ نے آئی جی سندھ کو نیو یارک پولیس کے ساتھ ٹریننگ سسٹم کا جائزہ لینے کی ہدایت کی، نیو یارک پولیس کے وفد اراکین کا کہنا تھا کہ کراچی اور نیویارک میں کافی مماثلت ہے، دونوں شہروں میں دس فیصد لوگ ایسے ہونگے جو نوے فیصد آبادی کے خلاف جرائم کرتے ہیں، اس رویے کو بدلنے کے لیے ضروری ہے کہ جرم کرنے والے کو معلوم ہو کہ اس پر قانون کی نظر ہے۔

مراد علی شاہ نے وفد کو بتایا کہ ماضی میں کراچی خطرناک شہروں میں شمار ہوتا تھا، تاہم پولیس کی کوششوں کے باعث اب کراچی پرامن شہر ہے ، اب شہر میں صرف اسٹریٹ کرائم کا مسئلہ ہے جس پر قابو پانے کے لیے ٹیکنالوجی کا استعمال اور جرائم پیشہ عناصر کے خلاف قانون سازی کی جارہی ہے ۔