تحریک انصاف کو وہ ریلیف بھی دیا گیا جو مانگا ہی نہیں گیا تھا، اے این پی

عوامی نیشنل پارٹی نے کہامخصوص نشستوں بارے سپریم کورٹ کے فیصلے کا احترام کرتے ہیں، 8 فروری کے انتخابات کی شفافیت پر ہمارے تحفظات آج بھی برقرار ہیں۔

مخصوص نشستوں بارے سپریم کورٹ فیصلہ کے حوالے سے عوامی نیشنل پارٹی کے مرکزی ترجمان انجینئر احسان اللہ خان نے کہا ہے ہم دہراتے ہیں کہ یہ تاریخ کے سب سے دھاندلی زدہ اور متنازعہ انتخابات تھے، یہ اداروں کی ہی ذمہ داری تھی کہ شفاف اور مداخلت سے پاک انتخابات کا انعقاد کراتے ،الیکشن کمیشن اپنی ذمہ داریاں پوری کرنے میں بری طرح ناکام ہوچکا ہے۔

انھوں نے کہا کہ مخصوص نشستوں کے حوالے سے بھی الیکشن کمیشن نے ڈرامہ بازياں کیں،اے این پی پہلے ہی بتا چکی ہے کہ ان نشستوں پر حق انہی کا ہے جن کے اراکین اسمبلیوں میں ہیں،تحریک انصاف کو مخصوص نشستوں کے ساتھ وہ ریلیف بھی دیا گیا جو مانگا ہی نہیں گیا تھا، آئینی ماہرین اس پر ضروری روشنی ڈالیں کہ جو معاملہ سپریم کورٹ میں تھا ہی نہیں اس کا فیصلہ کیسے کیا گیا؟

انہوں نے کہا کہ آئین کی بالادستی کیلئے عدلیہ میں بھی اصلاحات کی اشد ضرورت ہےانجینئر احسان اللہ خان نے کہاانصاف کی بجائے ذاتی پسند نا پسند کے فیصلے کرنے والوں کا بھی محاسبہ کرنا ہوگا،عدلیہ سمیت تمام اداروں کو اپنے آئینی دائرہ اختیار تک ہر صورت محدود ہونا ہوگا،کسی کی ایماء پر استعمال ہونے کی روش کو ہمیشہ کیلئے ترک کرنا ہوگا،جب تک آئین کی حکمرانی نہیں ہوگی ہم کسی صورت آگے نہیں بڑھ سکتے۔