چیف جسٹس کو دباؤ میں نہیں لایا جا سکتا، تحریک انصاف کے خط پر سپریم کورٹ کا اعلامیہ

سپریم کورٹ نے چیئرمین پاکستان تحریک انصاف کے خط پر اعلامیہ جاری کردیا۔

اعلامیہ کے مطابق یکم دسمبر کو سات صفحات کی درخواست مع 77 صفحات موصول ہوئی، دستاویز تیار کرنے والے وکیل کا نام اور رابطہ کی تفصیلات نہیں دی گئی،لفافے کے مطابق دستاویز انتظار حسین پنجوتھہ نے کوریئر کی تھی، دستاویز بظاہر ایک سیاسی جماعت کی جانب سے بھیجی گئی تھی۔

اعلامیہ میں مزید کہا گیا کہ اس جماعت کی اچھی نمائندگی وکلاء کرتے رہے ہیں، پچھلے دنوں سپریم کورٹ میں اس جماعت کے وکلاء فوجی عدالتوں اور انتخابات کیس کو تکمیل تک لے گئے،یہ امر حیران کن ہے کہ سربمہر لفافہ موصول ہونے سے پہلے ہی دستاویز میڈیا کو جاری کی گئی۔

سپریم کورٹ اعلامیہ میں کہا گیا کہ چیف جسٹس پاکستان قاضی فائز عیسیٰ کو اپنی آئینی ذمہ داریوں کا ادراک ہے،چیف جسٹس قاضی فائز عیسیٰ کو نہ دباؤ میں لایا جا سکتا ہے نہ کسی کی حمایت کرینگے،چیف جسٹس فائز عیسیٰ اللہ کے فضل سے اپنے حلف کے مطابق فرائض کی انجام دہی کرتے رہیں گے۔